नातेदारबाटै बलात्कृत १५ वर्षिया किशोरी आमा बनिन्

काठमाडौँ, २० असोज । हाडनाता करणीबाट गर्भवती भएकी १५ वर्षिया किशोरी आमा बनेकी छिन् । बाजुराको बूढीनन्दा नगरपालिका स्थायी ठेगाना भएकी बालिका सेफ हाउस बाजुरामा बस्दै आएकी थिइन् । स्वास्थ्यमा समस्या देखिएपछि राष्ट्रपति महिला उत्थान कार्यक्रमअन्तर्गत महिला, बालबालिका तथा ज्येष्ठ नागरिक मन्त्रालयले उनको उद्धार गरेको थियो ।

मन्त्रालयको राष्ट्रपति महिला उत्थान समन्वय इकाइद्वारा यही असोज १७ गते ‘दुर्गम क्षेत्रमा ज्यान जोखिममा परेका गर्भवती तथा सुत्केरी महिलाहरुका लागि हवाई उद्धारसम्बन्धी कार्यविधि, २०७७’ बमोजिम नेपाली सेनासँग समन्वय गरी उद्धार गरिएको हो ।

जिल्ला अस्पताल बाजुरा, जिल्ला समन्वय समितिबाट सञ्चालित सेफ हाउसका एक जना कमर्चारीका साथ उहाँलाई प्रदेश अस्पताल, सुर्खेतमा उद्धार गरिएको मन्त्रालयले जनाएको छ । जिल्ला अस्पताल, बाजुराका चिकित्सक प्रकाशबहादुर बुढाका अनुसार बालिका हाडनाता करणीमा परी गर्भवती भएको र ३६ हप्ताको गर्भवती बेहोस भएको अवस्थामा उनको उद्धार गरिएको थियो ।

सेफ हाउसका कर्मचारीका अनुसार  किशोरी कक्षा ६ मा अध्ययनरत छिन् भने उनका आफन्त सम्पर्कमा छैनन् । उनका आमा, बुबा भारतमा रहेको समेत जानकारी प्राप्त भएको छ । 

उद्धारको भोलिपल्टै पीडितले बच्चालाई जन्म दिएको र हाल आमा तथा बच्चा दुवैको अवस्था स्वस्थ रहेको जानकारी प्राप्त भएको मन्त्रालयले जनाएको छ ।    

आर्थिक वर्ष २०७५/७६ देखि सुरु गरिएको राष्ट्रपति महिला उत्थान कार्यक्रम दुर्गम क्षेत्रमा ज्यान जोखिममा परेका गर्भवती तथा सुत्केरीका प्रभावकारी रुपमा सञ्चालनमा आएको छ । 

उक्त कार्यक्रम पूर्ण रुपमा १९ जिल्ला र आंशिक  रुपमा जम्मा २९ जिल्लाका (विकट स्थानीय तह) गरी जम्मा ४८ जिल्लामा लागु भैसकेको छ । यस कार्यक्रमअन्तर्गत नेपाली सेना तथा अन्य निजी हेलीकप्टरसँगको समन्वयमा हालसम्म जम्मा सात सय ५७ जना गर्भवती तथा सुत्केरीको उद्धार गरिएको छ ।