मुस्कान खातुन: केपी ओलीसँग अभिनय, प्रचण्डसँग राजनीति

काठमाडौँ। पुष्पकमल दाहाल ‘प्रचण्ड’ नेतृत्वको नेपाली कम्युनिष्ट पार्टी प्रवेश गरेकी मुस्कान खातुनले आफूलाई तेजाव आक्रमण गर्नेहरुले अनुहार जलाए पनि सपना जलाउन नसकेको प्रतिक्रिया दिएकी छिन्।

जेनजी आन्दोलनले बद्लिएको परिस्थितिपछि ठूला भनिने राजनीतिक दलहरु स्वयं अदल-बदल भइरहेको बेला बिहीबार मुस्कानले पार्टी प्रवेश गरेर राजनीतिमा सक्रिय हुने घोषणा गरेकी छन्। जेनजी पुस्ताकी मुस्कानले जेनजीहरुलाई पनि मुलुकमा परिवर्तनका लागि एक भएर अघि बढ्न आग्रह गरेकी छन्।

को हुन् मुस्कान?

मुस्लिम परिवारमा जन्मिएकी मुस्कान १५ वर्षको उमेरमा तेजाव आक्रमणको शिकार भएकी थिइन्। एक किशोरले प्रेम प्रस्ताव अस्वीकार गरेको भनेर उनलाई तेजाव आक्रमण गरेका थिए। लगभग ७ महिनासम्म उपचारका लागि उनी अस्पताल बस्नु परेको थियो।

आफू पीडित भएपछि उनले एसिड आक्रमण गर्नेलाई कडा कारबाही हुनुपर्ने विषयमा आवाज उठाउँदै आएकी छन्। उनको आवाजको सुनुवाइ गर्दै तत्कालीन सरकारले आक्रमणकारीलाई कडा कारबाही गर्न कानुन परिमार्जन गरेको थियो।

मुस्कानले अमेरिकी सरकारले प्रदान गर्ने अन्तर्राष्ट्रिय साहसी महिला आइडब्ल्युओसी अवार्ड पनि पाएकी छन्। उक्त पुरस्कार पाउने उनी अहिलेसम्मकै कम उमेरकी महिला हुन्।

चलचित्रको पर्दामा मुस्कानको कथा

कलाकार रमित ढुंगानाले मुस्कानकै कथामा चलचित्र ‘नमेटिने घाउ’ बनाएका थिए। जुन चलचित्रमा मुस्कानले एमाले अध्यक्ष केपी शर्मा ओलीलगायतसँग अभिनय पनि गरिन्। फिल्ममा केपी ओलीसँग स्क्रिन शेयर गरेकी मुस्कान राजनीतिमा भने प्रचण्डसँग हातेमालो गर्न आइपुगेकी छिन्। कुनै समय एउटै मोर्चामा भए पनि अहिले प्रचण्ड-ओली फरक कित्तामा उभिएका छन्।