प्रधानमन्त्रीज्यू, ११ रुपैयाँ ३० पैसा कहिले घट्छ ?

काठमाडौँ । पाँच महिनाअघि प्रधानमन्त्री केपी शर्मा ओलीले सामाजिक सञ्जालमार्फत डिजिटल भुक्तानीमा लाग्ने अतिरिक्त शुल्क हटाउने आश्वासन दिएका थिए । जाजरकोटका आफ्ना एक समर्थकको भनाई राख्दै डिजिटल भुक्तानीमा लाग्ने अतिरिक्त शुल्क अस्वाभाविक भएको आशय व्यक्त गरेका थिए ।  

‘हिजोआज फेसबुकको इनबक्समा मोबाइल बैंकिङ ट्रान्सफर गर्दा लाग्ने गरेको अतिरिक्त चार्जबारे फेसबुकका साथीहरुबाट सुझावहरु आइरहेका छन् । आजभोलि हामी धेरैजसो डिजिटल माध्यमबाट रकम ट्रान्सफर गर्ने गरेका छौँ । इन्टरनेटको सहजताले होला सानोसानो कारोबारमा पनि हामी क्यासलेस गर्न अभ्यस्त छौँ । साना डिजिटल कारोबार गर्दा निशुल्क गर्ने विषयमा म सम्बन्धित अधिकारीसँग छलफल गर्दै छु’, प्रधानमन्त्री ओलीले फेसबुकमा लेखेका थिए ।

प्रधानमन्त्री ओलीका सल्लाहकार विष्णु रिमालले डिजिटल भुक्तानीमा लाग्दै आएको शुल्कको विषयमा चासो व्यक्त गर्दै सुझाव मागेका थिए । पाँच महिनाअघि सामाजिक सञ्जालमा लेख्दै उनले १० रुपैयाँ भुक्तानी गर्दा ११ रुपैयाँ काटिनु जायज नभएको उल्लेख गर्दै सार्वजनिक रूपमा सुझाव माग गरेका थिए । 

प्रधानमन्त्री ओलीले छलफल गर्ने भनेको पाँच महिना बित्यो तर हालसम्म कुनै प्रगति भएको छैन । सामाजिक सञ्जाल प्रयोगकर्ता अहिले ओलीको कुरा सम्झँदै आक्रोशित छन् । 

सामाजिक सञ्जालमा सक्रिय हुने व्यक्तिमध्ये पर्छन्, प्रधानमन्त्री ओली । आफ्नो नेतृत्वमा सरकार बनेकै हप्ता नेपाल आयल निगमले पेट्रोलमा प्रतिलिटर १ रुपैयाँ घटाउँदा ‘हाम्रो सरकारले यस्तो राम्रो गर्‍यो है’ भनेर लेख्न भ्याउने प्रधानमन्त्री ओली डिजिडट भुक्तानीमा शुल्क जारी रहेको विषयमा अनविज्ञ छन् भन्न सकिन्न । यस विषयमा छलफलसमेत सुरु नगरेकोमा सामाजिक सञ्जाल प्रयोगकर्ता थप आक्रोशित छन् ।