अवैध भेप ल्याउने मिनबहादुरलाई कारबाही गर्न सांसदहरुको माग

काठमाडौँ । सांसदहरुले तातोपानी भन्सारबाट काठमाडौँ आउँदै गरेको गाडीमा अवैध भेप (विद्युतीय चुरोट) ल्याउने कार्यमा संलग्नलाई कानुनी कारबाही गर्न माग गरेका छन् । 

प्रतिनिधिसभाको आजको बैठकमा सांसद गङ्गा कार्कीले तातोपानी भन्सार नाकाबाट काठमाडौँ आउँदै गरेको ना६ख ५४९६ नम्बरको ट्रक बाह्रबिसेस्थित खोर्सानीबारीको अस्थायी प्रहरी चौकीले नियन्त्रणमा लिएको उल्लेख गर्दै त्यो गाडी भाटभटेनी सुपरमार्केटका साहु मीनबहादुर गुरुङको भएको जानकारीमा आएकाे भन्दै उनलाई कानुनी कारबाही गर्न माग गरिन् । 

सांसद मनिष झाले पनि बाह्रबिसेमा समातिएको अवैध भेप भित्र्याउनेलाई कारबाही गर्न माग गरे ।

केही दिनअघि समातिएको रु २५ करोड रकमका मालिक पत्ता लगाउन पनि उनले सरकारसँग माग गरे । भरिया समातेर कालाबजारिया संरक्षण नगर्न उनले ध्यानाकर्षण गराए । यसअघिका यस्तै घटनामा भरिया समातिए पनि अवैध सामान ल्याउने मालिकलाई उन्मुक्ति दिएको भन्दै उनले आपत्ति जनाए।