मन्त्रीहरूको विदेश भ्रमणमा कडाइ, यस्ता छन् आचारसंहिता (भिडियाेसहित)

काठमाडौं । सरकारले मन्त्रीहरूको विदेश भ्रमणमा कडाइ गर्ने निर्णय गरेको छ।

बुधबार बसेको मन्त्रिपरिषद् बैठकले एकै मन्त्रालयका मन्त्री र सचिव एउटै कार्यक्रममा सहभागी हुने भ्रमण स्वीकृत नगर्ने निर्णय भएकाे सरकारका प्रवक्ता एवं सञ्चारमन्त्री पृथ्वीसुब्बा गुरुङले जानकारी दिए।

उनका अनुसार एकै मन्त्रालयका मन्त्री र सचिव एउटै कार्यक्रममा जाँदा मन्त्रालयकाे सेवा प्रवाहमा असर पर्ने भएकाेले भ्रमणमा कडाइ गरिएकाे हाे।

उनले भने, ‘एउटै मन्त्रालयको मन्त्री र सचिव एउटै कार्यक्रममा सहभागी हुने भ्रमण स्वीकृत नगर्ने निर्णय भएको छ। किनभने त्यस्तो गर्दाखेरि मन्त्री पनि नहुने र सचिव पनि नहुदाँ मन्त्रालयमा काममा रिक्तता हुन्छ। यसले सुशासन र सेवा प्रवाहमा असर पर्छ भनेर यस्तो निर्णय गरेका छौँ।’

यसैगरी बैठकले मन्त्रीहरूको विदेश भ्रमणमा विशेष आचारसंहिता बनाइएकाे उनले बताए। उनका अनुसार मन्त्रीहरू मन्त्रीस्तरीय सम्मेलन, बैठकमा मात्र विदेश जाने निर्णय गरिएको छ।

‘मन्त्रीस्तरीय सम्मेलन जहाँ जहाँ हुन्छ त्यस्ताेमा मात्र जाने, त्यसमा पनि सामान्य टेबल संवाद कार्यक्रममा नजाने। मन्त्रीहरूले कुनै सरकारकाे नीतिको बारेमा मन्त्रालयकाे तर्फबाट बोल्नैपर्ने परिस्थिति भएकाे बेला, नेपाल सरकार पक्ष राष्ट्र भएकोले मन्त्रालयकाे तर्फबाट सरकारकाे प्रतिनिधित्व गर्दै कहीँ मताधिकार प्रयोग गर्नुपर्ने हुनसक्छ । कहीँ हस्ताक्षर गर्नुपर्ने हुनसक्छ, त्यस्तो बेलामा जाने अन्यथा सानोतिनो निमन्त्रणमा भ्रमण स्वीकृत नगर्ने निर्णय भएको छ’, उनले भने।

राष्ट्रपति एवम प्रधानमन्त्रीको उच्चस्तरीय भ्रमण दल २१ सदस्यीभन्दा ठुलो नहुने यसअघि नै निर्णय भइसकेको उल्लेख गर्दै उनले कर्मचारीको हकमा सचिव र सहसचिव पनि एकै भ्रमण टोलीमा धेरै नजाने निर्णय भएकाे बताए। उनले सेवा प्रवाहलाई ध्यान दिएर सुशासन प्रवर्द्धनमा टेवा पुर्याउनका लागि यस्तो निर्णय भएको बताए। 

मन्त्रिपरिषद् बैठकका निर्णय सनाउँदै सरकारका प्रवक्ता