महाकुम्भकी भाइरल सुन्दरी भन्छिन् ‘मैले दीक्षा मात्रै लिएकी छु’

नयाँ दिल्ली । उत्तर प्रदेशको प्रयागराजमा चलिरहेको महाकुम्भ मेलामा उत्तराखण्डकी एक युवती आम मान्छेको आँखामा पर्न सफल भएकी छिन् । सामाजिक सञ्जालमा ‘सुन्दर साध्वी’ भनेर चिनिने हर्ष रिचारिया अहिले सामाजिक सञ्जालमा भाइरल भएकी छिन् । 

परम्परागत पोशाकमा, रुद्राक्षको माला लगाएर महाकुम्भ मेलामा सहभागी युवतीले निधारमा चन्दन लगाएकी छिन् । एक साध्वीको रुपमा प्रस्तुत भएकी रिचारिया मिडियामा यसरी छाइन् कि अहिले उनलाई नचिन्ने कोही छैन । मिडियाले उनलाई साध्वी भनेर व्याख्या गरिरहँदा उनले भने आफुले मन्त्र दिक्षा मात्रै लिएको बताएकी छिन् ।

‘मैले बाल्यकालदेखि नै साध्वी हुँ भनेर कहिँ कतै भनेको छैन, अहिले पनि साध्वी भनेर दावी गर्दिन । मैले मन्त्र दीक्षा मात्र लिएको छु ।’ एक अन्तर्वार्तामा उनले भनिन् ।

को हुन् हर्ष रिचारिया ?

एन्कर एवं सामाजिक कार्यकर्ताको परिचय बनाएकी उनी अहिले निरञ्जनी अखाडाका आचार्य महामंडलेश्वर स्वामी कैलाशानन्द गिरीजी महाराजको शिष्यको रूपमा चिनिन्छिन् ।

दुई वर्षअघि, उनी शान्ति खोज्दै आध्यात्मिकतामा प्रवेश गरेकी ‘आफ्नो नयाँ पहिचानका लागि मैले आफ्ना पुराना सबै कुरा छाडें’ सुश्री रिचरियाले महाकुम्भ मेलालाई आफ्नो आध्यात्मिक यात्राको प्रमुख अंशको रुपमा व्याख्या गरेकी छिन् ।