लुइँटेलको नियुक्ति बिचबाटोबाटै गायब, चापागाईं नेप्सेको सिइओ नियुक्त

काठमाडौं । सरकारले नेपाल स्टक एक्सचेन्ज (नेप्से)को प्रमुख कार्यकारी अधिकृत (सीईओ) नियुक्त गरेको छ। 

सोमबार साँझ बसेको मन्त्रिपरिषद्को बैठकले चूडामणि चापागाईंलाई सीईओमा नियुक्त गरेको हो ।

नेप्से सीईओका लागि गत फागुन १२ मा पहिलोपटक आवेदन माग भएको थियो । १२ जनाले आवेदन दिएका थिए । अर्थ मन्त्रालयले सहसचिव सेवन्तक पोखरेलको संयोजकत्वमा गठन गरेको नियुक्ति सिफारिस समितिले ५ जनाको नाम सिफारिस गरेको थियो ।

सो सूचीमा चापागाईंसहित नारदकुमार लुइँटेल, पूर्णप्रसाद आचार्य, बद्रीप्रसाद प्याकुरेल र हेमन्त बस्याल परेका थिए ।

एक साता अघि मन्त्रिपरिषद् बैठकले नारद लुइँटेल नियुक्त गरेको समाचार बाहिरिएको थियो । सूचना बाहिरिए लगत्तै बधाई सन्देश समेत पाइसकेका थिए तर, मुख्यसचिवले निर्णयमा प्रमाणित गरेर अर्थ मन्त्रालयमा पठाएका थिएनन् ।