सुन तस्करीमा ५ वर्ष जेल बसेका थिए २५ करोडसहित पक्राउ परेका लामा

काठमाडौँ । स्रोत नखुलेको  २५ करोड २२ लाख ४५ हजार बराबरको विदेशी मुद्रासहित पक्राउ परेका व्यक्तिलाई प्रहरीले सार्वजनिक गरेको छ ।

सिन्धुपाल्चोकको भोटेकोशी गाउँपालिका-१ का ४३ वर्षीय फुच्चे भन्ने कुसाङ लामालाई प्रहरीले मंगलबार दिउँसो पत्रकार सम्मेलनमार्फत सार्वजनिक गरेको हाे ।

काठमाडौँ उपत्यका अपराध अनुसन्धान कार्यालय टेकुको टोलीले टोखा नगरपालिका–१ झोर क्षेत्रबाट लामालाई २५ करोड रकमसहित गए राति पक्राउ गरेको थियाे ।

ना१ख १६५२ नम्बरको मालवाहक ट्रकमा रसुवा नाका हुँदै नेपाली रुपैयाँ, अमेरिकी डलर, युरोलगायत विभिन्न मुलुकका मुद्रा लगिँदै गरेको भन्ने सूचनाका आधारमा उनलाई पक्राउ गरिएकाे प्रहरीले जनाएकाे छ । ट्रकको चालक बस्ने ठाउँमा ‘फल्सबटम’ बनाई लुकाईछिपाई ल्याएको थियाे ।

प्रहरीका अनुसार लामा यसअघि नै ७ किलो सुन तस्करी प्रकरणमा ५ वर्ष जेल बसेर छुटेका थिए । सुनसहित कलंकीबाट समातिएर उनी २०७८ मा छुटेका थिए ।

बरामद गरिएको विदेशी मुद्रामा अमेरिकी डलर एक सय दरका तीन हजार ११९ थान, अमेरिकी डलर ५० दरका १७९, युरो ५०० दरका ११ थान, युरो २०० दरका ४८०, युरो १०० दरका चार हजार १४८ थान, युरो ५० दरका १७ हजार १७७ थान रहेको कार्यालयले जनाएकाे छ ।

बरामद गरिएका विदेशी मुद्रासहित निजलाई विदेशी विनिमय (नियमित गर्ने) ऐन, २०१९ बमोजिमको कसुरमा थप अनुसन्धान र कारबाहीका लागि राजस्व अनुसन्धान विभागको जिम्मा लगाइएको छ ।