माधव नेपालको कोठा खोज्दै केपी ओली

काठमाडौं । सोमबार नेपालकाे राजनीतिमा एउटा अनौठो र दुर्लभ घटना घट्यो । दुर्लभ यस अर्थमा कि नेकपा एमाले अध्यक्ष एवं प्रधानमन्त्री केपी शर्मा ओली र नेकपा एकीकृत समाजवादी पार्टीका अध्यक्ष माधवकुमार नेपाल कुम जोडेर एउटै बेन्चमा बसे, अनि भलाकुसारी गरे आधा घन्टा जति ।

राजनीतिकाे ५० वर्षदेखि एउटै पार्टीमा रहेका नेपाल र ओलीको पछिल्लो तीन वर्ष यता बोलचालसमेत बन्द छ । यो तीन वर्षको अवधिमा उनीहरु थुप्रै पटक एउटै कार्यक्रममा भेटिए तर, अपरिचित व्यक्तिझैं बोल्दै नबोली हिँडे ।

तीन वर्ष यता अपरिचित यात्रीजस्ता दुई पात्रलाई सोमबारको भेटघाटको साइत पत्रकार कमल कोइरालाको मृत्युले जुराएको थियो । कोइराला परिवारका एक्ला कम्युनिष्ट पत्रकार एवं कूटनीतिज्ञ कमलको ८७ वर्षको उमेरमा निधन भएको थियो । अन्तिम संस्कारअघि श्रद्धाञ्जलीका लागि उनको शव काठमाडौंकाे सुविधानगरस्थित एकीकृत समाजवादीको पार्टी कार्यालयमा राखिएको थियो । उनै स्व कोइरालालाई श्रद्धाञ्जली दिन पुगेका थिए, प्रधानमन्त्री ओली ।

माधव नेपालसँग तीन वर्षपछि कुम जोडेका ओली एकीकृत समाजवादीको पार्टी अफिसमा पहिलो पटक प्रवेश गरेका थिए । ओलीको आगमनलाई एकीकृत समाजवादीका नेता प्रकाश ज्वालाले ‘आइसकब्रेक’ भनेर टिप्पणी गरेपछि नेपाली राजनीतिमा फेरि एक हुने ‘र्युमर’ फैलिएको छ ।

किन गए ओली

ओली र नेपालको भेट नेता ज्वालाले भनेजस्तै तत्कालका लागि आइसब्रेक नहोला तर, यो सामान्य घटना होइन । केबल स्व पत्रकार कोइरालालाई श्रद्धाञ्जली दिन मात्रै ओली त्यहाँ पुगेका थिएनन् । किनकी प्रमुख प्रतिपक्षी दलका नेताले संसदमा सम्बोधन गर्ने दिन बालुवाटारमा टिकटकरसँग गफिएर बसेका ओली आफैंमा जब्बर नेता हुन् । ‘के गर्न पर्ने हो’ भन्दा पनि ‘आफुलाई के गर्दा ठिक लाग्छ’ भन्नेमा बढी विश्वास गर्छन् ।

त्यही ढिटकै कारण इतिहासमै सर्वाधिक कमजोर बनेका ओली अहिले राजनीतिमा नयाँ विकल्पको खोजीमा छन् । सुशासनलाई प्रमुख एजेण्डा बनाएर नेपाली कांग्रेससँगको सहकार्यमा प्रधानमन्त्री भएका ओलीका लागि अहिले सत्तासहयोगी दल कांग्रेसको साथ नै सबैभन्दा ठूलो दुर्भाग्य र निरर्थक बनेको छ ।

‘म आफू पनि घुस खान्न र अरुलाई पनि खान दिन्नँ’ भन्ने ओली अहिले यति निरिह छन् । सत्तासाझेदार देउवाको निर्देशनअनुसार विभिन्न काण्डहरुमा मुछिएका पात्रहरुलाई चोख्याउँदैमा ठिक्क छ । बालमन्दिर जग्गा प्रकरणमा संलग्नलाई मुद्दा नचलाउने निर्णय होस् या भ्रष्टाचारमा दोषी ठहर भएका दिवंगत कांग्रेस नेता खुमबहादुर खड्काको सम्पत्ति जोगाउन अध्यादेशमार्फत ऐन संशाेधन गर्न ।

यी त प्रतिनिधी घटना हुन् । ओली प्रधानमन्त्री भएदेखि ६ महिना यता सुशासनको धज्जी उडाउने गरी सरकारले गरेका यस्ता किर्ते दर्जनौं छन् । ‘कांग्रेसको व्यवहारबाट प्रधानमन्त्री ओली वाक्क-दिक्क भइसक्नुभएको छ’, एमालेका एक नेताले भने, ‘कांग्रेस नेतृत्वको व्यवहारकै कारण फेरि नयाँ संकेत देखिने सम्भावना बढेको छ ।’

फेरि बाम गठबन्धनको प्रसंग सुरु भएको हो ? भन्ने प्रश्नमा उनी भन्छन्, ‘संकेतहरु देखिन थालेको छ । परिणाम देखिन केही समय लाग्छ र अबको गठबन्धन परिपक्व हुन्छ ।’

फेरि सरप्राइज

माओवादी र एमाले मिलेर नेकपा बनेको घटना धेरै कम्युनिष्ट नेताका लागि ‘सरप्राइज’ थियो । तत्काल बाम गठबन्धन हुनुमा माओवादी अध्यक्ष प्रचण्डभन्दा पनि ओलीको बढी हात थियो । अन्य पार्टीका कुरा छाडौं, एमाले-माओवादीका धेरै नेताहरुलाई पार्टी घोषणाको दिनसम्म पनि पूरा जानकारी थिएन ।

यस्ता परिघटनालाई गोप्य राख्न सक्नु ओलीको विषेशता हो । राजनीतिको उत्तरार्धमा ओलीले फेरि यस्तै ‘सरप्राइज’ दिए भने आश्चर्य नमाने हुन्छ ।