कर्तव्य ज्यानमुद्दामा संलग्नलाई सफाई दिएपछि पीडित परिवारको अदालतमा धर्ना

रौतहट । न्याय दिन नसकेको भन्दै जिल्ला अदालत रौतहटका एक जना न्यायाधीशविरूद्ध एक परिवार धर्नामा बसेका छन् ।

कर्तव्य ज्यान मुद्दाका अभियुक्तलाई आर्थिक प्रभावमा परी सफाइ दिएको भन्दै जिल्ला न्यायाधीश मनोज केसीलाई कारबाहीको मागसहित पीडित परिवार बुधबारदेखि धर्नामा बसेका हुन् ।

बुधबार राति ९ बजे जिल्ला प्रहरी कार्यालय रौतहटको गस्ती टोलीले बलपूर्वक धर्नास्थलबाट आफूहरूलाई उठाएको कारण आज बिहान १० बजेदेखि सपरिवार धर्नामा बसेको पीडित राजन गुप्ताले बताए ।

न्यायको माग गर्दै बुधबार दिउँसोदेखि धर्ना सुरू गर्दाको समयदेखि नै केही प्रहरीले विभिन्न बहानामा अनावश्यक दुःख दिइरहेको गुप्ताले गुनासो गरे ।

यमुनामाई गाउँपालिका–४ सरुअठा गाउँका स्व. राम विनोद गुप्ताकी आमा, बुवा, श्रीमती, भाइ–बहिनीहरू, भिनाजु, सम्धीसहित १८ जना अदालतको मुलगेटको छेउमा ब्यानर झुण्ड्याएर धर्नामा बसेका छन् ।

पसलमा उधारो सामान नदिएको भन्दै ४ असार २०७६ मा विनोद गुप्तालाई गाउँकै एक समूहले कुटपिट गरेको थियो ।

टाउकोमा गम्भीर चोट लागेका विनोदको उपचारको क्रममा नेशनल मेडिकल कलेज वीरगन्जमा ६ दिनपछि असार १० गते मृत्यु भएको थियो ।

मृत्युलगत्तै उनका भाइ राजन गुप्ता र श्रीमती अनिता देवीले दिएको जाहेरीको आधारमा १३ वर्षीय नाबालकसहित विन्देश्वरी सिंह, रामकिशोर सिंह, रोहितकुमार सिंह, रोशन सिंह, अरविन्द कुमार सिंह, वडाबाबु सिंह र रामविनोद सिंहमाथि तत्कालै जिल्ला प्रहरी कार्यालय रौतहटले कर्तव्य ज्यान अगाडि बढाएको थियो ।

रामकिशोर सिंह र रामविनोद सिंह, निखिल कुमार सिंहलाई एक वर्षअघि प्रहरीले पक्राउगरी कारबाहीको लागि जिल्ला अदालत रौतहटमा मुद्दा पेस गरेको थियो ।

अदालतले  नाबालक १३ वर्षीयलाई तत्काल सुधारगृह वीरगन्ज र पछि अभिभावकको जिम्मा लगाएको थियो ।

अन्य, दुवैजना रामकिशोर सिंह र रामविनोद सिंह, लाई तत्काल जिल्ला अदालतले धरौटीमा छोड्ने आदेश दिएको थियो ।

धरौटीमा छुटेर तारेखमा रहेका अभियुक्त दुवै जना रामकिशोर सिंह र रामाबिनोद सिंहलाई गत २० गते आइतबार जिल्ला अदालतमा रौतहटमा पेस गर्दा न्यायाधीश केसीको इजलासले अभियोग दाबी नपुग्ने भन्दै सफाइको फैसला सुनाएको थियो ।

हत्यामा संलग्न व्यक्तिलाई सफाइ दिएपछि आफू मर्माहित भएको भन्दै न्याय न पाएसम्म आन्दोलन जारी रहने गुप्ता परिवारले अडान लिएका छन् । न्यायका लागि आफूले आन्दोलित गरिरहँदा सरुअठा गाउँका सिंह थरका केही व्यक्ति आएर पटक–पटक धम्की दिइरहेको मृतकका भाइ राजन गुप्ताले बताए ।

‘न्यायको लागि सपरिवार धर्नामा बसिरहँदा पटक–पटक धम्की आउँदा आफूहरू असुरक्षित महसुस गरिरहेका छौं, आवश्यक सुरक्षा प्रहरीले दियोस्,’ उनले भने ।

उक्त घटनाका अन्य चार जना आरोपी भन्ने हालसम्म फरार रहेको जिल्ला प्रहरी कार्यालय रौतहटले जनाएको छ ।