केजरीवालको राजीनामा पछि दिल्लीको मुख्यमन्त्री को ?

दिल्लीका मुख्यमन्त्री तथा आम आदमी पार्टीका राष्ट्रिय संयोजक अरविन्द केजरीवालले मुख्यमन्त्री पदबाट राजीनामा दिने घोषणा गरेपछि दिल्लीमा को मुख्यमन्त्रीको कुर्चिमा बस्ने हो चासोका साथ हेरिएको छ । 

दिल्लीका जनताले आफूलाई ‘इमानदार’ प्रमाणित नगरेसम्म मुख्यमन्त्रीको कुर्सीमा नबस्ने बताउदै आएका छन् केजरीवालले । यदि जनताले आफूलाई भोट दिए भने यो आफ्नो ‘इमान्दारिता’को प्रमाण पत्र हुने उनको भनाई छ । 

आम आदमी पार्टी (आप) को कार्यालयमा पार्टी कार्यकर्तालाई सम्बोधन गर्दै मुख्यमन्त्री अरविन्द केजरीवालले आइतबार भने ‘म दुई दिनपछि मुख्यमन्त्री पदबाट राजीनामा दिन गइरहेको छु । जनताले आफ्नो निर्णय नदिएसम्म म मुख्यमन्त्रीको कुर्सीमा बस्ने छैन । म हरेक घर र गल्लीमा जान्छु तर जनताबाट निर्णय नआएसम्म मुख्यमन्त्रीको कुर्सीमा बस्ने छैन ।’

उनले अगाडि भने ‘निर्वाचन केही महिनापछि हुन्छ । यदि तपाईंलाई केजरीवाल इमानदार लाग्छ भने मलाई भोट दिनुहोस् र लाग्दैन भने नदिनुहोस् । म चुनावबाट अनुमोदित भएपछिमात्र मुख्यमन्त्रीको रूपमा कार्यभार सम्हाल्नेछु । तपाईंको मत मेरो इमान्दारिताको प्रमाण हुनेछ ।’

तीन दिन अघि जेलबाट जमानतमा रिहा भएका मुख्यमन्त्री केजरीवालले भने ‘आगामी फेब्रअरीमा निर्वाचन हुने बताइएको छ । म महाराष्ट्रको चुनावसँगै नोभेम्बरमा चुनाव हुनुपर्ने माग गर्दछु ।’

‘निर्वाचन नहुञ्जेलसम्मका लागि पार्टीबाट अर्को कोही मुख्यमन्त्री बन्ने र यसका लागि आगामी दुई  वा तीन दिनमा विधायकहरूको बैठक बस्नेछ र बैठकले अर्को मुख्यमन्त्रीको निर्णय गर्नेछ ।’ उनले भने । 

केजरीवालले केन्द्र सरकारले भाजपाले चुनाव हारेका राज्यका मुख्यमन्त्रीविरुद्ध मुद्दा दायर गर्ने सूत्र अपनाएको आरोप पनि लगाए। राजिनामाबारे आफूमाथि उठाइएको प्रश्नबारे भने ‘केजरीवालले जेलबाट किन राजीनामा नदिएको भनेर प्रश्न उठेको छ । म लोकतन्त्र बचाउन चाहन्थेँ त्यसैले राजीनामा नदिएको हुँ ।’ 

दिल्लीका मुख्यमन्त्री तथा आम आदमी पार्टीका राष्ट्रिय संयोजक अरविन्द केजरीवाल शुक्रबार राति तिहाड जेलबाट छुटेपछि शनिबार पार्टीका वरिष्ठ नेताहरूसँग बैठक गरेका थिए ।  आइतबार पार्टी कार्यालयमा उपस्थित हुनुभएको हो । 

सर्वोच्च अदालतले दिल्लीको कथित मदिरा नीति प्रकरणसँग सम्बन्धित भ्रष्टाचारको मुद्दामा उनलाई जमानत दिएको केही घण्टापछि शुक्रबार साँझ जेलबाट रिहा भएका थिए ।

नयाँ मुख्यमन्त्री को ?

केजरीवालको राजीनामापछि मुख्यमन्त्री को हुने भन्नेमा चासो छ । कतिपयले केजरीवालले धर्मपत्नी सुनितालाई बनाउने अनुमान गरेका छन् । तर, केजरीवालका नजिकको हवाला दिँदै भारतिय मिडियाले सुनितालाई मुख्यमन्त्री नबनाउने उल्लेख गरेका छन् । ‘यदि सुनितालाई मुख्यमन्त्री बनायो भने भाजपाले परिवारवादको आरोप लगाउछन् त्यसकारण केजरीवालले सुनितालाई बनाउदैनन् ।’ आपका एक जना नेताले भने ।