‘गृहमन्त्री र आइजीपीलाई कार्वाही गर्नुपर्छ’

काठमाडौ । नेकपा एकीकृत समाजवादीका सांसद प्रकाश ज्वालाले गृहमन्त्री रमेश लेखक र नेपाल प्रहरीका महानिरीक्षक बसन्तबहादुर कुँवरमाथि छानबिन हुनुपर्ने माग गरेका छन् ।

शुक्रबार प्रतिनिधिसभा बैठकमा बोल्दै उनले सर्लाहीमा अन्तरजातीय विवाह गर्ने सत्यन्द्र कुमार राम (चमार) र नेहा रौनियारको विषयमा उनीहरूमाथि छानबिन हुनुपर्ने बताएका हुन् ।

बिहीबारको संसद् बैठकमा पनि यो विषयमाथि चर्को बहस भएको छ । सत्ता र प्रतिपक्ष दुवैतर्फका सांसदहरूले यस घटनाबारे ध्यानाकर्षण गराएका थिए ।

त्यसमाथि शुक्रबारको बैठकमा बोल्ने क्रममा सांसद ज्वालाले गृहमन्त्री र आईजीपीमाथि छानबिन हुनुपर्ने र दोषीलाई कारबाही हुनुपर्ने माग राखे ।

‘सत्यन्द्र राम र नेहा रौनियारको विवाहलाई सर्वोच्चले वैद्यता दिएको छ । तर, उक्त दम्पतीलाई मुम्बईबाट समेत पक्राउ गरेर ल्याएर यातना दिनका लागि अत्याचार गर्नका लागि निर्देशन दिने गृहमन्त्री, आईजीपी लगायतलाई छानबिन गरी दोषीलाई कडाभन्दा कडा कारबाही गरियोस् भन्ने माग गर्दछु,’ उनले भनेका छन् ।

अन्तरजातीय विवाह गरेकै कारण गृहमन्त्री लेखकको निर्देशनमा प्रहरी महानिरिक्षक कुँबरले पदको दुरुपयोग गर्दै सत्यन्द्र राम र नेहा रौनियारलाई यातना दिएका थिए । सोही घटनलाई लिएर अहिले सडकबाट गृहमन्त्री लेखकको राजीनामाको माग भइरहेको छ ।