५ महिनापछि जलेको पुर्खौली घर पुगे पूर्वगृहमन्त्री लेखक

महेन्द्रनगर। पूर्वगृहमन्त्री रमेश लेखक जेनजी आन्दोलनको पाँच महिनापछि सोमबार बिहान कञ्चनपुरको बेदकोट नगरपालिका–८ मा रहेको पुर्खौली घर पुगेका छन्।

जेनजी आन्दोलनका क्रममा गत भदौ २४ गते उनको पुर्खौली घर आन्दोलनकारीले आगजनी गरी पूर्णरुपमा नष्ट गरेका थिए।

आसन्न प्रतिनिधिसभा सदस्यको निर्वाचनका क्रममा पार्टी उम्मेदवारको पक्षमा माहोल बनाउन गृहनगर पुगेका कांग्रेसका नेतासमेत रहेका पूर्वगृहमन्त्री लेखकले जलेको घरको अवस्थाबारे स्थलगत जानकारी लिएका हुन्।

लेखकको काठमाडाैँको नैकापमा रहेको घर, बेदकोट नगरपालिका–८ मा रहेको पुर्खौली घर पूर्णरुपमा जलेर नष्ट भएको छ। भने महेन्द्रनगरस्थित बजारमा रहेको घर मर्मतसम्भार गरी उनी आश्रय लिइरहेका छन्।

पहिलो पटक पुर्खौली घर पुगेका नेता लेखकले स्थानीयसँग साक्षात्कारसमेत गरे। स्थानीयबासीले गाउँमा भइरहेको सडक पूर्वाधारलगायतका विकासका बारेमा जानकारी गराएका थिए।

कञ्चनपुर निर्वाचन क्षेत्र नं. ३ बाट २०७९ सालको निर्वाचनमा जित हासिल गर्दै गृहमन्त्री बनेका लेखक यसपटक भने उम्मेदवार छैनन्। नेपाली कांग्रेसले डडेल्धुरामा पूर्वप्रधानमन्त्री शेरबहादुर देउवा र नेता लेखकलाई टिकट दिएन। पार्टीले यहाँ पूर्वजिल्ला पार्टी सभापति हरिप्रसाद बोहरालाई उम्मेदवार बनाएपछि नेता लेखकले चुनावी भेटघाटलाई तिव्रता दिएका छन्।