सम्पादक लम्साललाई चलचित्र पत्रकारिता रजत सम्मान

इलाम । समय आवाज डटकमका सम्पादक ध्रुव लम्साल सम्मानित भएका छन् । चलचित्र पत्रकार संघ नेपाल केन्द्रीय समितिको आयोजनामा संघको २६ ‍औं स्थापना दिवसको अवसरमा लम्साल राष्ट्रिय चलचित्र पत्रकारिता रजत सम्मानबाट सम्मानित भएका हुन् । नगद ५५ हजार पाँचसय ५५ सहित उनलाई सम्मान गरिएकाे छ ।

 चलचित्र पत्रकार संघ नेपाल कोशी प्रदेश शाखाको संयोजन र चलचित्र पत्रकार संघ नेपाल, इलाम, झापा, मोरङ र सुनसरी शाखाको व्यवस्थापनमा इलामको श्रीअन्तुमा भएको चलचित्र पत्रकारहरुको राष्ट्रिय भेलामा लम्सालसहित ७ पत्रकारलाई सम्मान एव‌ं पुरस्कार प्रदान गरिएकाे छ ।

भेलामा  विष्णु सुवेदीलाई राष्ट्रिय चलचित्र पत्रकारिता सम्मान, नरेन्द्र बस्नेत (कोशी)लाई राष्ट्रिय चलचित्र पत्रकारिता सम्मान, जीवन कुमार पराजुलीलाई राष्ट्रिय चलचित्र पत्रकारिता पुरस्कार र वर्षा बस्नेतलाई राष्ट्रिय चलचित्र पत्रकारिता पुरस्कार । रजत सम्मान प्राप्त गर्ने पत्रकारलाई जनही नगद ५५ हजार ५ सय ५५, पत्रकारिता पुरस्कार प्राप्त गर्ने पत्रकारलाई जनही नगद ५१ हजार छ ।

त्यस्तै पत्रकार रश्मी थापालाई राष्ट्रिय चलचित्र पत्रकारिता प्रोत्साहन पुरस्कार  र तुलसी प्रसाद निरौला (कोशी) लाई राष्ट्रिय मोफसल चलचित्र पत्रकारिता पुरस्कार । प्रोत्साहन पुरस्कार र मोफसल पत्रकारिता पुरस्कारको राशी जनही २५ हजार रहेको छ । 

सम्मानित तथा पुरस्कृतलाई चलचित्र विकास बोर्डका अध्यक्ष दिनेश डिसी, कलाकार बसुन्धरा भूसाल, नायक शिब श्रेष्ठ, कलाकार गौरी मल्ल, नेपाल चलचित्र कलाकार संघका अध्यक्ष मोहन निरौला, नेपाल चलचित्र निर्दशक समाजका अध्यक्ष जनकदीप पराजुली, संघका पूर्व अध्यक्ष विदुर गिरी, शान्तिप्रिय,दिनेश सिटौला  र संघका वर्तमान अध्यक्ष समीर बलामीलगायतले पुरस्कार र सम्मान प्रदान गरेका थिए ।

भेलामा सिनेमा पर्यटन महोत्सव कार्यशाला मिडिया मन्थन सिनेमा संवाद र अन्तरक्रिया गरिएको र आज बृहत चलचित्र पत्रकारिता कार्यशाला र सिनेमा संवाद गरिने संघका महासचिव रघुनाथ सापकोटाले जानकारी दिए ।