सार्वजनिक पद धारण गरेका सबैको सम्पत्ति छानबिन गर्न माग

काठमाडाैं ।  नेकपा एकीकृत समाजवादीले सार्वजनिक पद धारण गरेका सबैको सम्पत्ति छानबिन गर्न माग गरेकाे छ ।

दुई महिने आन्दोलनका कार्यक्रम घोषणा गर्दै शुक्रबार एकीकृत समाजवादीले सार्वजनिक पद धारण गरेर बसेका सबैको सम्पत्ति छानबिनको माग राखेको हो ।

'अहिलेसम्म सार्वजनिक पदमा रहेका सबैको सम्पत्ति छानबिन गर्न संवैधानिक तथा कानुनी प्रबन्धका साथ एउटा शक्तिशाली सम्पत्ति छानबिन आयोग गठन गरियोस्,’ महासचिव घनश्याम भूसालद्वारा सार्वजनिक बक्तव्यमा भनिएको छ ।

 ‘भ्रष्टाचार सबैतिर छ, तर राजनीतिक पार्टीहरूको संरचना र कार्यप्रणाली नै भ्रष्टाचारलाई निरुत्साहित र दण्डित गर्ने ग्यारेन्टी नगरेसम्म त्यसको प्रभावकारी नियन्त्रण हुन सक्दैन, अर्थात् राजनीतिक नेताहरू भ्रष्टाचारमुक्त छन् भन्ने विश्वास सिर्जना गर्नु अत्यन्तै जरुरी भएको छ,’ बक्तव्यमा उल्लेख छ ।

राष्ट्रिय स्वतन्त्र पार्टी (रास्वपा)ले पनि सत्तामा रहेका दलहरुकाे सम्पत्ति छानबिन हुनु पर्ने माग राख्दै आएकाे छ ।