डिजिटल बोर्डमा ओलीविरुद्धको नारा डिस्प्ले भएपछि एमाले कार्यकताले कुटे प्राधिकरणका प्रमुख

काठमाडौं । नेपाल विद्युत् प्राधिकरण भरतपुर वितरण केन्द्रका प्रमुख रामु श्रेष्ठमाथि कार्यकक्षमै कुटपिट भएको छ ।

मंगलबार बिहान प्रधानमन्त्री केपी शर्मा ओलीविरुद्धको नारा कार्यालयको डिजिटल बोर्डमा डिस्प्ले भएपछि नेकपा एमालेका कार्यकर्ताले कुटपिट गरेका हुन् ।

विद्युत् ग्राहकका लागि सूचना राख्ने गरिएको कार्यालयको डिजिटल बोर्डमा कसले र कसरी प्रधानमन्त्री ओलीविरुद्धको नारा लेख्यो भन्ने विषयमा छलफल गरिरहेका बेला कार्यालय प्रमुख श्रेष्ठमाथि कुटिएको बताइएकाे छ ।

एमालेनिकट युवा संघका कार्यकर्ताले प्रमुखकाे कार्यकक्ष तोडफोडसमेत गरेका छन् । तोडफोडबाट कार्यालयको कम्प्युटर, टेबलकाे ग्लास, गमलालगायतका सामानहरु फुटेका छन् । साथै उनीहरुले शौचालयका ढोकासमेत तोडफोड गरेका छन्।

नेपाल विद्युत् प्राधिकरणका कार्यकारी निर्देशक कुलमान घिसिङलाई सरकारले हटाएपछि चाैतर्फी आलाेचन भइरहेकाे छ भने काठमाडाैँमा विराेध प्रदर्शन भइरहेकाे छ । सरकारले कुलमान हटाएकै समयमा कार्यालयको बोर्डमा प्रधानमन्त्रीविरुद्धको नारा डिस्प्ले भएकाे हाे । 

वितरण केन्द्रको सूचना बोर्डमा प्रधानमन्त्रीविरुद्ध देखिएको अमर्यादित नाराका बारेमा प्रमुख जिल्ला अधिकारी प्रकाश पौडेलले केन्द्रका प्रमुख श्रेष्ठलाई स्पष्टीकरण सोधेका छन् ।