नाै लाख ठगी आराेपमा हाँस्य कलाकार नारद खतिवडा पक्राउ

काठमाडाैं । हिरासतमा रहेका चिनियाँ नागरिकलाई छुटाइदिने भन्दै नौ लाख रुपैयाँ ठगी गरेको आरोपमा प्रहरीले कलाकार नारद खतिवडासहित तीन जनालाई पक्राउ गरेको छ। 

पक्राउ पर्नेमा सर्लाहीको लालबन्दी नगरपालिका–५ घर भई हाल काठमाडौँको बुद्धनगर बस्दै आएका कलाकार ५२ वर्षीय नारदप्रसाद खतिवडा, उदयपुरको कटारी नगरपालिका–७ सिरिसे घर भई हाल ललतिपुरको नख्खीपोट बस्ने ३८ वर्षीय विक्रमबहादुर थापा र नवलपरासीको बर्दघाट सुस्तापश्चिमका ५९ वर्षीय गोपालकुमार गुरुङ रहेका छन्। 

असार १२ गते अध्यागमन विभागले सानेपाबाट नौ जना चिनियाँ नागरिकलाई पक्राउ गरेको थियो। उनीहरू हाल विभागकै हिरासतमा छन्। 

उनीहरुलाई छुटाइदिने र अध्यागमन विभागमा रहेका अरु १५ वटा राहदानी पनि झिकाइदिने भनि ७२ लाख रुपैयाँमा मोलमोलाइ गरेको प्रहरीको दाबी छ। प्रहरीका अनुसार उनीहरूले चिनियाँ नागरिकबाट नौ लाख रुपैयाँ भने लिइसकेका थिए।