बालेनले खराब चित्रण गरेको वैद्यखानाको क्षमता बढाउन स्वास्थ्यमन्त्रीको निर्देशन

काठमाडौँ, ४ पुस । स्वास्थ्य तथा जनसङ्ख्या मन्त्री प्रदीप पौडेलले सिंहदरबारस्थित वैद्यखानामा आयुर्वेदिक औषधि उत्पादन वृद्धि गर्न आग्रह गरेका छन् ।

वैद्यखानाको औषधि उत्पादन अवस्थाबारे विहीबार अनुगमन गर्दै स्वास्थ्यमन्त्री पौडेलले वैद्यखानाका कर्मचारीहरुलाई भने ‘बजारमा वैद्यखानाको औषधिको माग छ, उत्पादन बढाउनुस ।’ 

मन्त्री पौडेलले बजारमा सिंहदरबार वैद्यखानाको औषधि किन्न खोज्दासमेत नपाइने अवस्था आएकाले आवश्यक कच्चा पदार्थ उपलब्ध नगराउने ठेकेदारलाई कालोसूचीमा राखेर नयाँ विकल्प खोज्न निर्देशन दिए । ‘बजारमा बिक्ने चिज हामी किन उत्पादन गर्न सक्दैनौँ ? आवश्यक बजेट अभाव हुन दिन्नौँ तर उत्पादन बढाउनुस् ।’ उनले भने ।

कर्मचारीहरुले स्रोत अभाव भएको गुनासो गरेपछि मन्त्री पौडेलले केही समयअघि वैद्यखानाका लागि बजेट विनियोजन गरेको उल्लेख गर्दै सार्वजनिक संस्थानहरुलाई पुँजीगत सहयोग गर्न सकिने तर तलब ख्वाउने रकम सरकारले दिन नसक्ने प्रष्ट पारे ।

महिना दिन अघि वैद्यखानामै आयोजित कार्यक्रममा काठमाडौं महानगरपालिकाका मेयर बालेन शाहले वैद्यखानालाई सरकारले सञ्चालन गरेको मध्ये खराब संस्थाको रुपमा चित्रण गर्दै किन खराब भनेर प्रश्न समेत गरेका थिए । उक्त कार्यक्रममा स्वास्थ्यमन्त्री पौडेल समेत सहभागी थिए । बालेनको प्रश्नले दवावमा परेका स्वास्थ्यमन्त्री पौडेलले नाफा कमाउने गरी काम गर्न वैद्यखानाका कर्मचारीलाई निर्देशन दिएका छन् ।