विप्लव भन्छन्- गफ चुट्ने नेताबाट रुपान्तरण सम्भव छैन

कर्णाली । नेपाल कम्युनिष्ट पार्टीका महासचिव नेत्रविक्रम चन्द (विप्लव)ले देशलाई समृद्ध बनाउनका लागि राजनीतिलाई आर्थिक क्रान्तिसँग जोड्नुपर्ने बताएका छन् । 

नेपाल कम्युनिष्ट पार्टी सुर्खेतद्वारा आज वीरेन्द्रनगरमा आयोजित ‘पत्रकार सम्मेलन’ मा उनले कृषि तथा आर्थिक क्रान्तिबाट आत्मनिर्भर मुलुक निर्माण अबको मूल सवाल भएको बताए । उत्पादनसँग जोडिएको पार्टीको अभियानअन्तर्गत सल्यान, रुकुम, रोल्पा, जुम्ला, कालीकोट, दैलेख हुँदै एक महिनाको अवधिमा सुर्खेत आई पुगेका उनले गफ चुट्ने नेताबाट देशको रुपान्तरण सम्भव नभएको तर्क गरे ।

“उत्पादनविनाको सुखभोग गर्नु कि भ्रष्टाचार हो कि त भने शोषण गर्नु नै हो । अब उत्पादन अभियानमा जोडिनुको विकल्प छैन । हरेकले पहिलो आफ्नो पार्टी, नेता, कार्यकर्ता आत्मनिर्भर बनाउँ अनि मात्र जनतालाई गएर उत्पादनमूलक कार्यमा जोडौँ । विदेशी एवं दातृ निकायहरुसँग ऋण लिने वा भिख मागेर देश समृद्ध बन्न सक्दैन ।” उनले भने ।

उनका अनुसार कर्णालीका डाँडापाखा ढाकिने गरी स्याउ तथा अन्य कृषि कार्य गर्न सकिन्छ तर अचेल कम्युनिष्ट नेतामा आवारा प्रवृत्ति बढ्दै गएको छ । नेता विप्लवले भने, “जनतामा जाँदा हरेकले माओवादी एक हुनुपर्ने इच्छा व्यक्त गरेको पाइयो ।”

उपयोग र निषेधवादी नीतिबाट नभई रुपान्तरणकारी सोच र उद्देश्यबाट माओवादी तथा कम्युनिष्ट एकता हुने र त्यो सम्भव रहेको महासचिव चन्दले बताउनुभयो । राजनीतिक गर्नेले श्रम गर्नुपर्ने भन्दै उहाँले जुम्लामा ७०० स्याउका बिरुवा रोप्नाका साथै कालीकोटमा भेडा फार्म उद्घाटन गरिएको जनाउनुभयो । भेडा फार्ममा अहिले करिब १५० भेडा रहेको र त्यसमा स्थानीय जनताले सहयोग गरेको उनले बताए ।