'खबरदार एउटा कुलमान लखेट्यौ भने हामी हजारौँ कुलमान लिएर आउँछौँ'

काठमाडाैं । बुधबार दिउँसाे सुरु भएकाे प्रतिनिधिसभा बैठकमा बाेल्नेमध्ये अधिकांश सासंद नेपाल विद्युत प्राधिकरण कुलमान घिसिङलाई सरकारले गर्न लागेकाे कारबाहीप्रति केन्द्रित भएका छन् ।

 नेकपा माओवादी केन्द्रका प्रमुख सचेतक हिरात पाण्डेले ऊर्जामन्त्रालयले विद्युत प्राधिकरणका कार्यकारी निर्देशक कुलमान घिसिङलाई कार्यसम्पादनमा शून्य अंक दिँदै स्पष्टीकरण सोधिएको भन्दै आपत्ति जनाए ।

'कुलमान घिसिङलाई निरन्तर सरकारले स्पष्टीकरण सोध्ने कुरा मिडियाहरूमा सुनिरहेका छौँ, उहाँको मूल्याङ्कनमा शून्य आएको सुनिरहेका छौँ,' उनले भने, 'एउटा व्यक्तिले राम्रो काम गरिरहेको छ, जसले विद्युत प्राधिकरणलाई नाफामा लगिरहेको छ। त्यसलाई अघि लैजानुपर्ने ठाउँमा शून्य अंक दिएको सुनिरहेका छौँ, यो कुरा के हो?'

राप्रपाका प्रमुख सचेतक ज्ञानेन्द्रबहादुर शाहीले कुलमान घिसिङमाथि सरकारले कारबाही गर्न लागेको भन्दै आपत्ति जनाए। 

'कुलमान घिसिङलाई हटाइयो भने नेपाललाई अन्धकारतिर धकेलियो भनेर सडक र सदन दुवैबाट आवाज उठ्छ', उनले भने।

राष्ट्रिय स्वतन्त्र पार्टी (रास्वपा)का सांसद मनिष झाले सरकारले विद्युत प्राधिकरणका प्रमुख कार्यकारी निर्देशक कुलमान घिसिङलाई कारबाही गर्न लागेकोप्रति आपत्ति जनाए। 

उनले कुलमान जस्तो मुलुकलाई फाइदा पु-याउने व्यक्ति कारबाही गर्ने सरकारको रवैया ठीक नहुने बताए। ‘खबरदार एउटा कुलामान लखेट्यौ भने हामी हजारौँ कुलमान लिएर आउँछौँ,’ झाले भने।