- असार ०७, २०८०
समयआवाज संवाददाता
काठमाडौँ । बुधबार प्रतिनिधिसभा बैठकमा राष्ट्रिय स्वतन्त्र पार्टी (रास्वपा) र नेपाली कांग्रेसका सांसदबीच रस्साकस्सी पर्यो । यस्तो हुनुको कारण थियो? रास्वपा सांसदहरुले संसदमा उठाएको जग्गासम्बन्धी कुरो ।
रास्वपाकी सांसद सुमना श्रेष्ठले कांग्रेसका सांसदले सार्वजनिक जग्गा हडपेको अभिव्यक्ति दिएपछि कांग्रेसका सांसद प्रतिकारमा उत्रिएका थिए । कांग्रेस सांसद राजेन्द्र केसी, राजेन्द्र बजगाई र शुसिला थिङले आपत्ति जनाए ।
सुमनाले कुरा राख्नेबित्तिकै कांग्रेस राजेन्द्र केसीले सुमनाले पुष्टि नहुने कुरा गरेको भन्दै आपत्ति जनाए ।
सुमनाले काठमाडौं जिल्लाको क्षेत्र नं ६ मा पर्ने तारकेश्वर-९ मा रहेको नेपाल सरकारको जग्गा नेपाली कांग्रेसका सांसदले कब्जा गरेर भोग चलन गर्दै आएको तर, स्थानीय बासिन्दाले गुनासो गरे पनि स्थानीय सरकारले जग्गा संरक्षणमा चासो नदिएको बताएकी थिइन् ।
तथ्य के हो ?
सुमनाले भनेकाे जग्गा तारकेश्वर नगरपालिका– ९ मनमैजुस्थित लोकतान्त्रिक चोकसंगै रहेको ९ आना जग्गा हो । जुन जग्गा कांग्रेस नेता एवं नेपाल चिकित्सक संघका पूर्वअध्यक्ष डा केदारनरसिंह केसी (कांग्रेस नेता अर्जुन नसिंह केसीका भाइ)ले मिचेका छन् ।
सो क्षेत्रमा विसं २०३९ सालमा नेता केसीले ५१ आना जग्गा किनेका थिए । ५१ आनाको ढिस्को किनेका केसीले ढिस्को सम्याउने क्रममा बाँकी ९ आना जग्गा पनि सम्याए र कम्पाउण्ड लगाएर छेके । नेता केसीले छेकेको ९ आना जग्गा नेवार समुदायका काखे बालकको मृत्यु हुँदा दाहसंस्कार गर्ने ठाउँ पनि हो ।
जब कांग्रेस नेताको कम्पाउण्डभित्र सरकारी जग्गा रहेको तथ्य सार्वजनिक भयो, त्यसपछि स्थानीय र नेता केसीबीच छलफल भयो । पटक–पटकको छलफलमा नेता केसीले जग्गा फिर्ता गर्ने सहमति जनाएपनि फिर्ता नगरेको स्थानीयको आरोप छ ।
तारकेश्वर नगरपालिकाका मेयर कृष्णहरि महर्जनले पनि डा. केसीको कम्पाउण्डभित्र सरकारी जग्गा रहेको स्विकार्छन् । स्थानीयका अनुसार अहिले उक्त क्षेत्रमा प्रतिआना ७० लाख रुपैयाँमा कारोबार हुने गरेको छ । चलनचल्तीको मूल्यअनुसार डा. केसीले मिचेको जग्गाको मूल्य पाँच करोड बढीको रहेको छ ।
काठमाडौँ क्षेत्र नम्बर ६ का सांसद शिखिर खनालले पनि प्रतिनिधिसभा बैठकको शून्य समयमा यही कुरा उठाएका थिए ।
टिप्पणीहरू: