कुलमानलाई हटाएपछि जनार्दनले भने- राम्रो काम गर्नेलाई लखेट्नेहरू सधैँ पराजित हुन्छन्

काठमाडाैँ । नेकपा माओवादी केन्द्रका उपमहासचिव जनार्दन शर्माले कुलमान घिसिङलाई नेपाल विद्युत् प्राधिकरणको कार्यकारी निर्देशकबाट हटाउनेहरू सधैँ पराजित टिप्पणी गरेका छन् । 

मन्त्रिपरिषद्को सोमबार बसेको बैठकले कुलमानलाई विद्युत प्राधिकरणको कार्यकारी निर्देशकबाट हटाउने निर्णय गरेपछि पूर्वऊर्जामन्त्रीसमेत रहेका शर्माले मंगलबार बिहान सामाजिक सञ्जालमार्फत टिप्पणी गरेका हुन् । 

‘राम्रो काम गर्नेलाई लखेट्ने सोच, प्रवृति र पात्रहरूले वेला वेलामा युद्ध जितेको आत्मसन्तुष्टि गरेपनि ती सधैँ पराजित नै हुन्छन्’, उनले लेखेका छन् ।  

उनले पहिले पनि लखेटिएका कुलमानलाई संघर्ष गरेरै नेपाल विद्युत प्राधिकरणको कार्यकारी निर्देशकको जिम्मेवारी दिएको उल्लेख गरेका छन् । 

उपमहासचिव शर्माले  भनेका छन्, ‘पहिले पनि लखेटिएका कुलमानलाई संघर्ष गरेरै नेपाल विद्युत प्राधिकरणको कार्यकारी निर्देशकको जिम्मेवारी दिएको कुरा स्मरण गर्दै, लोड सेडिङबाट आहत नागरिकलाई उज्यालो नेपालको हाम्रो सपना र योजनाको कार्यान्वयनमा कुलमानले खेलेको भुमिकाको प्रशंसा गर्दै भन्न चाहान्छु ।’

कुलमानलाई हटाउँदै प्राधिकरणको कार्यकारी निर्देशकमा हितेन्द्रदेव शाक्यलाई नियुक्त गरेपछि अहिले सरकारको चौतर्फी विरोध भइरहेको छ।