सेन्टर प्लाजामा आगलागी: १६ जनाको उद्धार

इटहरी (सुनसरी)। सुनसरीको इटहरीस्थित सेन्टर प्लाजामा आगो लागेपछि भवनभित्र फसेका १६ जनाको उद्धार गरिएकाे छ ।

इटहरी उपमहानरपालिका-६स्थित सेन्टर प्लाजामा बिहान साढे ९ बजेदेखि भएको आगलागीमा फसेका ५ जना महिला र ११ जना पुरुष गरी १६ जनाको उद्धार गरिएको  गृह मन्त्रालयले जनाएको छ ।

आगो लागेको सूचना पाउनासाथ नेपाली सेना, सशस्त्र प्रहरी बल, नेपाल प्रहरीसहित स्थानीय बासिन्दा उद्धार कार्यमा जुटिरहेका र आगो निभाउने काम गरिरहेका छन् ।

१० तले व्यावसायिक भवनकाे पाँचौँ तलामा आगो लागेपछि ग्यासका सिलिण्डर पड्केका छन् । भवनमा फसेका मानिसलाई डोरीको सहायताबाट बाहिर ल्याइएकाे छ ।  

भवनभित्र फसेका मानिसको सकुशल उद्धारका लागि गृह मन्त्रालयले पठाएको नेपाली सेनाको हेलिकोप्टर पनि इटहरी पुगेकाे छ ।