इरानबाट स्वदेश फर्कँदै गरेका अफगानी सवार बसमा आगलागी, ७६ जनाकाे मृत्यु

अफगानिस्तान। इरानबाट स्वदेश फर्कँदै गरेका अफगानी नागरिकहरू सवार बस र दुई अन्य सवारी साधनबीच पश्चिमी अफगानिस्तानमा भएको दुर्घटनामा ज्यान गुमाउनेको संख्या ७६ पुगेको एक प्रान्तीय अधिकारीले बुधबार जानकारी दिएका छन्।

हेरात प्रान्तीय सरकारका प्रवक्ता मोहम्मद युसुफ सईदीले एक वक्तव्यमा भने, ‘यो दुखद घटनामा ७६ जना नागरिकहरूले ज्यान गुमाउनु भएको छ, साथै तीन जना गम्भीर घाइते हुनु भएको छ।’

सेनाको विज्ञप्तिअनुसार, मृतकहरूलाई सैन्य अस्पतालमा सारिएको छ, जसमा एक दर्जनभन्दा बढी बालबालिका समेत रहेका छन्।

अल–फारुक सेनाको अस्पतालका प्रमुख चिकित्सक मोहम्मद जानान मुकद्दसका अनुसार, धेरै शवहरू यति धेरै जलेका थिए कि पहिचान गर्न गाह्रो भएको थियो।

मंगलबार राति हेरात शहर नजिकको गुजारा जिल्लामा दुर्घटना भएको हो। प्रहरीका अनुसार, बस इन्धन बोकेको ट्रकसँग ठोक्किँदा आगलागी भएको थियो।

दुर्घटनापछि केही घण्टासम्म सडकमा बसको जलिसकेको ढाँचा देखिएको समाचार संस्था एएफपीका एक पत्रकारले बताए।

बसमा सवार यात्रुहरू हालै इरानबाट राजधानी काबुल फर्किंदै गरेका अफगानी नागरिक रहेका प्रवक्ता सईदीले मंगलबार बताए।

संयुक्त राष्ट्रसंघीय आप्रवासन निकायका अनुसार, यस वर्षको सुरुदेखि हालसम्म इरान र पाकिस्तानबाट करिब १५ लाख अफगानी नागरिकहरू स्वदेश फर्किएका छन्। यी देशहरूले दशकौंसम्म शरण दिइसकेपछि आप्रवासीहरूलाई फिर्ता पठाउने प्रयास तीव्र बनाएका छन्।

स्वदेश फर्किएका धेरै नागरिकहरू वर्षौं विदेशमा बसेका, कुनै ठेगाना नभएका र थोरै सामानसहित आएका छन्, जसका कारण उनीहरूलाई पुनः बसोबास गर्न गम्भीर चुनौतीहरू झेल्नुपरेको छ। अफगानिस्तान हाल गरिबी र बेरोजगारीबाट ग्रस्त रहेको छ।

सरकारी सञ्चालित बख्तर समाचार एजेन्सीले यस दुर्घटनालाई हालका वर्षहरूमा भएको सबैभन्दा घातकमध्ये एक बताएको छ।

गत वर्षको डिसेम्बरमा अफगानिस्तानमा तेल ट्यांकर र ट्रकसँग भएको दुईवटा बस दुर्घटनामा कम्तीमा ५२ जनाले ज्यान गुमाएका थिए।

त्यस्तै, सन् २०२४ को मार्चमा हेलमन्ड प्रान्तमा बस र इन्धन ट्यांकर ठोक्किँदा २० जनाभन्दा बढीको मृत्यु र ३८ जना घाइते भएका थिए।

सन् २०२२ को डिसेम्बरमा सालङ दर्रामा भएको अर्को गम्भीर दुर्घटनामा इन्धन ट्यांकर पल्टिएर आगो लाग्दा ३१ जनाको ज्यान गएको थियो।