दलीय गणतन्त्रलाई जनताको गणतन्त्र बनाउन तेस्रो जनआन्दोलन आवश्यक छ: प्रभु साह

काठमाडौं । आम जनता पार्टी (आजपा)को पदाधिकारी बैठक बुधबार बस्ने भएकाे छ ।

पार्टी केन्द्रीय कार्यालय कोटेश्वरमा बस्ने पदाधिकारी बैठकले पार्टीद्धारा घोषित तेस्रो जनआन्दोलनलाई सफल बनाउन विभिन्न कमाण्ड तोक्नुका साथै समसामयिक विषयमा समेत महत्वपूर्ण निर्णय गर्नेछ ।

आजपा अध्यक्ष तथा पूर्वमन्त्री प्रभु साहले देशमा देखिएको वर्तमान संकटको जड नै अहिलेको दलाल दलतन्त्र भएको बताए । उनले दलीय गणतन्त्रलाई जनताको गणतन्त्र बनाउन तेस्रो जनआन्दोलन आवश्यक भएको बताए ।

आजपाले २०८० साल चैत २४ तेस्रो जनआन्दोलनको घोषणा गरेको थियो । दलीय दलाल दलतन्त्रले दल, नेता तथा नेताका आसेपासे मोटाएको र जनतामा निराशा छाएको निष्कर्ष निकाल्दै आजपा अध्यक्ष साहले तेस्रो जनआन्दोलनको आवश्यक्ता रहेकाले जनताको शासन व्यवस्थाका लागि तेस्रो जनआन्दोलनको उदघोष गरेका थिए । 

‘अहिले लुटकारी दलाल दलतन्त्रको हालीमुहाली छ । दलका सीमित नेता र तिनका आसेपासे मोटाएका छन् । लुट-भ्रष्टाचार, कुशासन, अनियमितता, मनोमानी बढ्दै गइरहेको वर्तमान अवस्थामा जनताको शासनका लागि तेस्रो जनआन्दोलनको विकल्प छैन्’, आजपा अध्यक्ष साहले भने, ‘अब जनताको गणतन्त्रका लागि हामी सडकमा आउनैपर्छ । भ्रष्ट दलीय व्यवस्थाको खारेज गर्नैपर्छ ।’

आजपाले आउँदो २४ चैतमा काठमाडौँको भृकुटीमण्डपमा विरोधसभा र प्रदर्शन गर्न लागेको छ । त्यसैको पूर्वसन्ध्यामा बस्न लागेको पदाधिकारी बैठकले आन्दोलनलाई सफल बनाउने बारेमा रणनीति तय गर्ने बताइएको छ ।

आजपाले विगतदेखि नै भ्रष्टाचार, कुशासन, अनियमितता, सरकारको मनोमानी कर आतंक, वैदेशिक रोजगार ठगीलगायतका विषयमा निरन्तर संघर्ष गर्दै आएको छ । बैठकमा विगतका आन्दोलनको समीक्षाका साथै अगामी आन्दोलनलाई सशक्त बनाउने बारेमा छलफल हुनेछ ।