बाजा गाजासहित लामिछाने पार्टी कार्यालय भित्रिएपछि केन्द्रीय समिति बैठक सुरु

काठमाडौं । शुभेच्छुकले बाजा गाजासहित सभापति रवि लामिछानेलाई पार्टी कार्यालय भित्र्याएपछि  राष्ट्रिय स्वतन्त्र पार्टी (रास्वपा) को केन्द्रीय समिति बैठक सुरु भएको छ ।

लामिछाने जेलबाट रिहा भएर फर्किएलगत्तै आज पहिलोपटक केन्द्रीय समिति बैठक बसेको हो ।

बैठकअघि उनलाई पार्टी कार्यालयमा बाजागाजासहित स्वागत गरिएको थियो । स्वागतपछि उनले कार्यालयमा उपस्थित शुभेच्छुकहरूलाई सम्बोधन गरेका थिए ।

त्यसपछि पार्टीका कार्यबाहक सभापति डिपी अर्यालले कार्यकक्षमा स्वागत गरे । अहिले केन्द्रीय समिति बैठक जारी छ ।

रिहा भएको भोलिपल्ट शनिबार चितवनको भरतपुरस्थिति चौबीसकोठीमा रास्वपाद्वारा आयोजित कार्यक्रममा उनले सम्बाेधन गरेका थिए । शनिबार काठमाडौंमा जेनजी आन्दोलनका शहीद परिवार र घाइतेलाई भेटेका थिए ।