संसद्मा आज प्रचण्डले सम्बोधन गर्ने, प्रधानमन्त्री ओली उपस्थित नहुने

काठमाडौँ। प्रतिनिधिसभाको बैठक आज दिउँसाे १ बजे बस्दैछ।

आजकाे बैठकमा प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल प्रचण्डले सम्बाेधन गर्ने कार्यसूची रहेकाे छ।

सोमबार बसेको प्रतिनिधिसभा कार्यव्यवस्था परामर्श समितिको बैठकमा भएकाे छलफलपछि प्रचण्डले संसद्लाई सम्बोधन गर्ने कार्यसूची तय भएको हो।

संसद्मा प्रचण्ड बोल्दा प्रधानमन्त्री केपी शर्मा ओली भने उपस्थित नहुने भएका छन्। प्रधानमन्त्री ओली कोशी प्रदेशसभालाई सम्बोधन गर्न र पूर्वाञ्चल विश्वविद्यालयको दीक्षान्त समारोहलाई सम्बोधन गर्न विराटनगर जाने भएका अनुपस्थित हुने भएका हुन् । प्रधानमन्त्रीले दिउँसो २ बजे कोशी प्रदेशसभालाई सम्बोधन गर्ने कार्यक्रम छ।

यसअघि गत माघ २४ गते पनि प्रचण्डले प्रतिनिधिसभामा सम्बोधन गर्दा पनि प्रधानमन्त्री ओली अनुपस्थित भएका थिए ।

यसैगरी आजकाे बैठकको सम्भावित कार्यसूचीमा कानुन, न्याय तथा संसदीय मामिलामन्त्री अजयकुमार चौरसियाले उपभोक्ता अदालतको गठनसम्बन्धी सूचना टेबुल गर्नेछन्।

यसैगरी बैठकमा सञ्चार तथा सूचना प्रविधिमन्त्री पृथ्वीसुब्बा गुरुङले राष्ट्रियसभामा उत्पत्ति भएको ‘आमसञ्चार परिषद् विधेयक, २०८१ लाई दफावार छलफलका लागि सम्बन्धित समितिमा पठाइयोस्’ भन्ने प्रस्ताव र  वन तथा वातावरणमन्त्री ऐनबहादुर शाही ठकुरीले ‘मोन्ट्रियल प्रोटोकल किगाली संशोधनमाथि सदनमा छलफल गरियोस्’ भन्ने प्रस्ताव प्रस्तुत गर्नेछन्।

आजको बैठकमा सो संशोधनमाथि छलफल पनि हुने सचिवालयले जनाएको छ।  वनमन्त्री ठकुरीले ‘मोन्ट्रियल प्रोटोकल किगाली संशोधनलाई अनुमोदन गरियोस्’ भन्ने प्रस्ताव पनि सभासमक्ष प्रस्तुत गर्नेछ।