पूर्वराजाले पनि नागरिकको हैसियतमा आफ्ना मत राख्न पाउँछन्: गगन थापा (भिडियाे)

मोरङ। नेपाली कांग्रेसका महामन्त्री गगन थापाले नेपाली जनताले लोकतन्त्रको विकल्प नखोजेको बताएका छन् ।

शुक्रबार विराटनगर विमानस्थलमा सञ्चारकर्मीहरुसँग कुरा गर्दै उनले जनताले पटक तानाशाह शासन व्यवस्थाको अनुभूति गरेकोले लोकतन्त्रको विकल्प नसोचेको प्रष्ट पारे ।

उनले पूर्व राजाको शासनकालमा राष्ट्रद्रोहको मुद्दामा कांग्रेससहितका अन्य पार्टीका नेतालाई जेलमा हालेको उदाहरण रहेको भन्दै पूर्वराजालाई आफ्ना मत जाहेर गर्दा पक्राउ गर्न वा मुखबन्द गर्न नजाने प्रष्ट पारे ।

‘गणतन्त्रको सुन्दर पक्ष भनेको पूर्व राजाले पनि नागरिकको हैसियतमा आफ्ना मत राख्ने स्वतन्त्रता पाएका छन् । विगतमा पूर्वराजाको शासनकालमा  राष्ट्रद्रोहको हामीले बोलेकै भरमा राज्यद्रोहको मुद्दामा जेलमा हालिएको थियो । पूर्वराजालाई आफ्ना मत जाहेर गरेकै भरमा पक्राउ गर्न वा मुखबन्द गर्न जादैनौँ’, महामन्त्री थापाले भने ।

महामन्त्री थापाले प्रजातन्त्रमा नागरिकले मुलुकको व्यवस्थाप्रति होइन,सरकारको काम कारवाहीप्रति असन्तुष्टि निर्वाचनको माध्यमबाट व्यक्त गर्ने गरेको विचार राखे ।

उनले पार्टीका नेता तथा कार्यकर्ताहरुले गुट उपगुट नवनाई जनताको सर्वोपरि हितका तर्फ कार्य गर्नुपर्ने सुझाव दिए ।

एक प्रश्नको जवाफमा महामन्त्री थापाले प्रधानमन्त्री केपी शर्मा ओलीले अध्यादेशका सम्वन्धमा सत्तामा रहेका दलहरुसँग छलफल गरिरहेको र केही दिनभित्र समझदारी हुने विश्वास जनाए ।

फरक प्रसङगमा उनले नेपाली कांग्रेसको महाधिवेशनको प्रकिया शुरु भैसकेको र विधानले तोकेको सीमा भित्र हुने बताए ।