अपरेशन सिन्दुरकाे बिरुद्ध पाकिस्तानकाे ‘अपरेशन बन्यान मार्स’

पाकिस्तानी सेनाका प्रवक्ताले भारतले आफ्ना तीन सैन्य हवाई अड्डाहरूमा मिसाइल प्रहार गरेको बताएका छन् । भारतले पाकिस्तानी सेनाको दाबीमा अहिलेसम्म कुनै प्रतिक्रिया दिएको छैन ।

पाकिस्तानी सेनाका प्रवक्ता लेफ्टिनेन्ट जनरल अहमद शरीफ चौधरीले सरकारी टेलिभिजनमा भने ‘पाकिस्तानी सेनाले जवाफ दिनेछ ।’

उनले दाबी गरे कि पाकिस्तानी सेनाको वायु रक्षा प्रणालीले भारतका अधिकांश क्षेप्यास्त्रहरू खसालेको छ । उनले यो पनि भने कि देशको सेना ‘पूर्ण रूपमा तयार’ छ ।

पाकिस्तानले निशाना बनाएको दाबी गरेको सैन्य विमानस्थलमध्ये एक रावलपिंडीमा रहेको नूर खान हो, जुन पाकिस्तानको राजधानी इस्लामाबादबाट १० किलोमिटर टाढा छ ।

पाकिस्तानको ‘अपरेसन बन्यान मार्स’

पाकिस्तानको सरकारी टिभी र सेनाको जनसम्पर्क विभागले भारत विरुद्ध प्रतिआक्रमण सुरु गरेको बताएका छन् । पाकिस्तानको यी दाबीहरूमा भारतले अहिलेसम्म केही भनेको छैन ।

पाकिस्तानी सेनाको जनसम्पर्क विभाग, आईएसपीआरका अनुसार पाकिस्तानले बदलाको कारबाहीलाई ‘अपरेशन बन्यान मार्स’ नाम दिएको छ ।

भारतले मे ७, बुधबार बिहानै ‘अपरेशन सिन्दूर’ अन्तर्गत पाकिस्तान र पाकिस्तान प्रशासित कश्मीरका धेरै ठाउँमा आक्रमण गरेको थियो ।

यस आक्रमणपछि, पाकिस्तानले ३३ जनाको मृत्यु भएको र ठूलो क्षति बेहोरेको स्वीकार ग-यो ।

भारत र पाकिस्तानबीचको तनाव अप्रिल २२ मा जम्मू कश्मीरको पहलगाममा भएको आक्रमणसँगै सुरु भएको थियो । यस आक्रमणमा २६ जनाको मृत्यु भएको थियो ।

उमर अब्दुल्लाहले के भने ?

जम्मू कश्मीरका मुख्यमन्त्री उमर अब्दुल्लाहले पाकिस्तानबाट भएको गोलीबारीमा एक अधिकारीको मृत्यु भएको बताएका छन् ।

उनले सामाजिक सञ्जाल प्लेटफर्म एक्समा पोस्ट गरे, ‘राजौरीबाट दुखद खबर । हामीले जम्मू कश्मीर प्रशासनिक सेवाका एक समर्पित अधिकारी गुमाएका छौं । हिजो मात्र उनी उपमुख्यमन्त्रीसँग जिल्लामा थिए र मेरो अध्यक्षतामा भएको अनलाइन बैठकमा भाग लिए ।’ आज पाकिस्तानबाट भएको गोलाबारीबाट राजौरी शहरलाई निशाना बनाइएको थियो । यस क्रममा अतिरिक्त जिल्ला विकास आयुक्त राजकुमार थापाको घर निशाना बन्यो र आक्रमणमा उनको मृत्यु भयो ।’

बिहीबार के भयो ?

बिहीबार, भारत र पाकिस्तानले आक्रमणको सम्बन्धमा आ–आफ्नो दाबी गरे ।

भारतीय रक्षा मन्त्रालयका अनुसार, ‘पाकिस्तानले जम्मू, पठानकोट र उधमपुरमा रहेका सैन्य स्टेशनहरूमा ड्रोन र मिसाइल आक्रमण गरेको छ । यी आक्रमणहरूलाई विफल पारिएको छ ।’

रक्षा मन्त्रालयले भन्यो, “कुनै पनि जीवन वा सम्पत्तिको क्षति भएको छैन । भारत आफ्नो सार्वभौमसत्ता र आफ्ना नागरिकहरूको रक्षा गर्न प्रतिबद्ध छ ।’

भारतले भन्यो कि यी सबै क्षेप्यास्त्रहरूलाई वायु रक्षा प्रणालीद्वारा सफलतापूर्वक रोकिएको र निष्क्रिय पारिएको थियो ।

अर्कोतर्फ, पाकिस्तानका रक्षामन्त्री ख्वाजा आसिफले जम्मू कश्मीरमा भएको कुनै पनि आक्रमणको जिम्मेवारी अस्वीकार गरेका छन् ।

ख्वाजा आसिफले बीबीसीलाई भने, “हामी यसलाई अस्वीकार गर्छौं, हामीले अहिलेसम्म केही गरेका छैनौं । जब पाकिस्तानले आक्रमण गर्छ तब सबैलाई थाहा हुनेछ ।’

जम्मू कश्मीरमा विस्फोट र ब्ल्याकआउटको रिपोर्ट आएको केही समयपछि ख्वाजा आसिफ बीबीसीसँग कुरा गरिरहेका थिए ।

बुधबार के भयो ?

बुधबार, मे ८ मा, भारतीय रक्षा मन्त्रालयले दाबी ग¥यो कि “विश्वसनीय जानकारी अनुसार, लाहोरमा एक वायु रक्षा प्रणाली नष्ट गरिएको छ ।’

साथै, भारतीय रक्षा मन्त्रालयले पाकिस्तानले ड्रोन र मिसाइल प्रयोग गरेर भारतका धेरै सैन्य अड्डाहरूलाई लक्षित गर्ने प्रयास गरेको बताएको छ ।

पाकिस्तानले पनि भारतमाथि यस्तै आरोप लगाएको छ र २५ वटा भारतीय ड्रोन खसालेको बताएको छ ।

बीबीसीले दुवै देशले गरेको कुनै पनि दाबीको स्वतन्त्र रूपमा पुष्टि गरेको छैन ।

मे ७ मा के भयो?

भारतले बुधबार बिहानै पाकिस्तान र पाकिस्तान प्रशासित कश्मीरमा हवाई आक्रमण गरेको छ । भारतले पाकिस्तानमा रहेका ‘आतंकवादी लुक्ने ठाउँहरू’ लाई लक्षित गरेको बताएको छ ।

यसैबीच, पाकिस्तानले आफ्नो भूमिमा ‘आतंकवादी शिविर’ रहेको भारतको दाबीलाई अस्वीकार गरेको छ ।

भारतले बुधबार पाकिस्तान र पाकिस्तान प्रशासित कश्मीरमा हवाई आक्रमणको घोषणा गरेको छ । भारतले यस कारबाहीलाई ‘अपरेशन सिन्दूर’ नाम दियो ।’

भारतीय विदेश सचिव विक्रम मिश्रीले भने, “पहलगाम आक्रमणको अनुसन्धानले आतंककारीहरूको पाकिस्तानसँगको सम्बन्ध उजागर गरेको छ ।’  भारतले पाकिस्तान र पाकिस्तान प्रशासित कश्मीरका नौ स्थानहरूलाई निशाना बनाएको बताएको छ । जबकि पाकिस्तानले छ ठाउँमा आक्रमण भएको जनाएको छ ।

पाकिस्तानले पाँच भारतीय जेट र एउटा ड्रोन खसालेको दाबी गरेको छ, जसको भारतले पुष्टि गरेको छैन ।

बुधबार राष्ट्रलाई सम्बोधन गर्दै पाकिस्तानका प्रधानमन्त्री शाहबाज शरीफले पाकिस्तानले आफ्नो “प्रतिक्रिया’ दिएको बताए ।

पाकिस्तानले भारतको कारबाहीमा ३१ जनाको मृत्यु भएको र ५७ जना घाइते भएको बताएको छ ।

विश्वभरका नेताहरूले भारत र पाकिस्तानलाई शान्ति कायम राख्न अपील गरेका छन् । अमेरिकी राष्ट्रपति डोनाल्ड ट्रम्पले यदि कुनै पनि तरिकाले सहयोग गर्न सक्छन् भने, त्यो गर्ने बताएका छन् ।