जेनजीकाे दवावपछि प्रधानमन्त्रीकाे सचिवालयमा छ जना मात्रै

काठमाडौँ । प्रधानमन्त्री सुशीला कार्कीले आफ्नो सचिवालय तथा विज्ञ समूहको आकार घटाउने निर्णय गरेकी छिन् । प्रधानमन्त्री तथा मन्त्रिपरिषद्को कार्यालयका प्रवक्ता हेमराज अर्यालले आज जारी गरेकाे विज्ञप्तिमा अब सचिवालयमा छ जना मात्र रहने उल्लेख छ ।

सचिवालयमा मुख्य सल्लाहकार एक, जनसम्पर्क सल्लाहकार एक, प्रमुख स्वकीय सचिव एक, प्रेस संयोजक एक, स्वकीय शाखा अधिकृत (फोटोग्राफर) एक र जनस्वास्थ्यविज्ञ (अवैतनिक) एक गरी छ जना मात्र कायम राखिएको विज्ञप्तिमा जनाइएको  छ । बाँकी सबै नियुक्ति प्रधामन्त्री कार्कीले मङ्सिर ११ गतेदेखि लागू हुनेगरी खारेज गरिएका छन् ।   

प्रधानमन्त्रीको सल्लाहकार र सचिवालय व्यवस्थापन कार्यविधि २०७४ (एघारौँ संशोधन २०८१) अनुसार प्रधानमन्त्रीको सचिवालयमा विभिन्न पदका ६६ जनाको दरबन्दी कायम रहेको छ । प्रधानमन्त्री कार्कीले अति जरुरी पदमा मात्र नियुक्ति गरी जम्मा २० जनाको मात्र सचिवालय बनाउनुभएको थियो । अब २० जनाबाट पनि घटेर छ जनामा सीमित हुने भएको छ ।

सचिवालयमा कार्यरत आदर्शकुमार श्रेष्ठले श्रीमती र सालीलाई जागिर खुवाएकाे सार्वजनिक भएपछि प्रधानमन्त्री कार्कीकाे आलाेचना भएकाे थियाे । केही जेनजी समुहले प्रधानमन्त्रीकाे राजीनामा समेत मागेका थिए । सुशासनका लागि गठन भएकाे सरकारले नातावादमा विश्वास गर्न थालेपछि सरकारका विषयमा समेत प्रश्न उठेकाे छ ।