ओली सरकार र संविधान असफल भइसक्याे: प्रभु साह

काठमाडौं । आम जनता पार्टी (आजपा) का अध्यक्ष एवं पूर्वमन्त्री प्रभु साहले प्रधानमन्त्री केपी शर्मा ओली नेतृत्वको सरकार र संविधान दुवै असफल भइसकेको टिप्पणी गरेका छन् । 

आजपाको बुधबार काठमाडौंमा बसेको पदाधिकारी बैठकलाई सम्बोधन गर्दै उनले सरकार र संविधान दुवै असफल भईसकेको बताउदै नागरिकको सर्वोच्चता सहितको व्यवस्थाका लागि पार्टीद्धारा घोषित तेस्रो जनआन्दोलन सफल बनाउन आह्वान गरे ।

‘सरकार सबै मोर्चामा असफल भइसकेको छ । प्रधानमन्त्री केपी शर्मा ओलीसहित बहुमत मन्त्रीहरु कार्यसम्पादन मूल्यांकनमा असफल सक्नुभएको छ । आफ्नै मूल्यांकनमा सरकार असफल भइसकेको छ । जनताको चाहना र आवश्यक्ता सम्बोधन गर्न सकेको छैन्,’ आजपा अध्यक्ष साहले भने, ‘हामीले घोषणा गरेअनुसार नागरिकको सर्वोच्चतासहितको तेस्रो जनआन्दोलनलाई सशक्त र सफल बनाउन सबै एकजुट भएर अगाडि बढनुको विकल्प छैन् ।’

आउँदो २४ मा आजपाले काठमाडौंमा खबरदारी सभाका साथै विरोध प्रदर्शन गर्दैछ । त्यसैको पूर्वसन्ध्यामा बसेको पदाधिकारी बैठकमा आजपा अध्यक्ष साहले आन्दोलनलाई कसरी व्यवस्थित र प्रभावकारी रुपमा अगाडि बढाउने भन्ने बारेमा बृहत छलफल आवश्यक रहेको बताए ।

गत वर्ष नै तेस्रो जनआन्दोलनको आह्वान गरेका साहले वर्तमान संविधान र सरकारकै कारण अहिले मुलुकमा संकट आएको टिप्पणी गर्दै अहिलेको व्यवस्थाको खारेजीका लागि तेस्रो जनआन्दोलन आवश्यक रहेको बताए ।

नेताहरुको कुकर्मका कारण गणतन्त्र बदनाम भएको बताउँदै उनले भ्रष्ट एवं दलाल दलतन्त्रको विरुद्ध तेस्रो जनआन्दोलनको विकल्प नभएको बताए । दलाल दलतन्त्रको अन्त्य नै वर्तमान संकटको समाधान भएको साहले बैठकमा पेश गरेको राजनीतिक प्रतिवेदनको निष्कर्ष रहेको छ ।

‘आज दलाल दलतन्त्रले देश बेहाल छ । नेताहरुको कुकर्मले गणतन्त्र बदनाम छ । जनताको रगत पसिना चुसेर नेताहरु मोटाएका छन् । नेताका आसेपासे मालामाल छन्, जनता लचार छन्’, आजपा अध्यक्ष साहले भने, ‘कसैको अगाडि कहिल्यै नझुकेको हाम्रो गौरवशाली इतिहास आज दलालीले पोतिँदैछ । नेपाली जनताको सपना खोसिएको छ ।’

केही गर्न विदेशै जानुपर्ने बाध्यात्मक स्थिति शासकहरुले निर्माण गरेको आरोप उनले लगाए । पढनेदेखि रोजगारका लागि विदेशिने क्रम बढेको बताउँदै यो सबै अवस्थाको सृजना शासनमा रहेका नेताहरुले निर्माण गरेको आरोप उनको छ ।

‘केही गर्नका लागि विदेशै जानुपर्ने बाध्यात्मक स्थिति निर्माण गरिएको छ । आश बोकेर विदेश जानेहरु आज लाश बनेर फर्किरहेका छन् । यतिमात्रै हैन आज हाम्रो अर्थतन्त्र डमाडोल छ, व्यापार घाटामा छ, नेताहरुको अत्याचार र भ्रष्टाचार बढेको छ । सुशासन सुनशास छ, विकास विलाएको छ, कर आतंक छ, महंगी आतंक छ । हाम्रो प्राकृतिक सम्पदाहरुको खुलेयाम विक्री र दोहन भईरहेको छ । जनता दिनदिनै बैदेशिक ऋणमा थिचिँदैछन् । यी तमाम संकटको अन्त्यका लागि तपाईं हामी अगाडि आउनैपर्छ’, साहले भने ।

२४ चैतमा जनआन्दोलन दिवशकै दिन भ्रष्टाचारविरुद्ध खबरदारी सभा र विशेष प्रदर्शन गर्न लागेको आजपाले सरकारको मनोमानी कर आतंक, भ्रष्टाचार, अनियमितताविरुद्ध संघर्ष गर्दै आएको छ । गत वर्ष २४ चैतकै दिन आजपा अध्यक्ष साहले काठमाडौँको भृकुटी मण्डपबाट दलाल दलतन्त्रको विरुद्ध तेस्रो जनआन्दोलनको घोषणा गरेका थिए ।

बसेको पदाधिकारी बैठकले आन्दोलनको कमाण्डरका साथै विभिन्न समितिहरु गठन गर्दै सम्पन्न हुने महासचिव त्रिभुवन साह अमरले जनाएका छन् ।