ओली र लेखकलाई पक्राउ नगरेसम्म आन्दोलन जारी राख्ने भन्दै मिराज समूह आक्राेशित

काठमाडौं । भदौ २३ र २४ मा भएको जेनजी आन्दोलन दमन गर्न भुमिका निर्वाह गरेका तत्कालिन प्रधानमन्त्री केपी शर्मा ओली, गृहमन्त्री रमेश लेखकलाई पक्राउ गर्नु पर्ने भन्दै मिराज ढुंगानको जेनजी समुहले आन्दोलन सुरु गरेको छ ।

सोमबार प्रधानमन्त्रीलाई ज्ञापनपत्र दिन सिंहदरबार पुगेको समुहलाई प्रधानमन्त्रीले भेट नदिएपछि मागपत्र सिंहदरबार गेटमै टाँसेर फर्किएको थियो । मंगलबार पनि ज्ञापनपत्र बुझाउन पुगेको टोलीलाई प्रहरीले रोकेपछि केहीबेर ठेलमठेल भएको थियो । प्रधानमन्त्रीलाई ज्ञापनपत्र बुझाउन नदिएको भन्दै अहिले ढुंगानालगायत जेनजी समुह हातमा कालोपट्टि बाँधेर बसेको छ ।

मागपत्रमा तत्कालीन प्रधानमन्त्री केपी शर्मा ओली, गृहमन्त्री रमेश लेखकसहित भदौ २३–२४ को घटनामा संलग्न सबैलाई पक्राउ गर्नुपर्ने उल्लेख छ । वर्तमान संविधान संशोधनको लागि सर्वपक्षीय सरकार बनाउने र घोषित निर्वाचन रोक्न माग गरिएको छ ।

सबै राजनीतिक दलका नेता तथा पूर्वसांसद–मन्त्रीहरूको चलअचल सम्पत्ति रोक्का गर्नुपर्ने, शक्तिशाली भ्रष्टाचार निर्मुल आयोग गठन, सरकारी सेवामा दलीय कर्मचारी संगठन सदाका लागि प्रतिबन्ध गर्नुपर्ने माग गरिएको छ ।