प्रमुख तीन दलका शीर्ष नेतृत्वको बैठक बस्दै

काठमाडौं । प्रमुख तीन दलका शीर्ष नेताहरुको बैठक सोमबार बस्ने भएकाे छ ।

नेकपा (एमाले) का अध्यक्ष तथा प्रधानमन्त्री केपी शर्मा ओली नेपाली कांग्रेसका सभापति शेरबहादुर देउवा र प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ सहितको बैठक आज बस्न लागेको हो ।

बैठकमा संक्रमणकालीन न्यायबारे छलफल हुने बताइएको छ । राजसंस्था पुनर्स्थापनाको माग गर्दै राजावादीहरु सक्रिय भएपछि गणतन्त्रवादी तीन दलले विभिन्न कार्यक्रम घोषणा गरेका छन् ।

तीन शीर्ष नेतृत्वको बैठक पहिलो पटक हुन लागेको हो । पछिल्लो दुई सातायता तीन दलको शीर्ष नेताको बैठक बस्ने योजना हुँदाहुँदै पनि बस्न सकेको थिएन ।

राजावादीहरुको सक्रियता बढेसँगै रक्षात्मक बनेका प्रधानमन्त्री ओलीले प्रचण्डलाई भेट्नका लागि सन्देश पठाए पनि भेट्न सकेका थिएनन् । आज बस्ने बैठकले संक्रमणकालीन न्यायबारे ठोस छलफल गर्ने भएको छ ।