ओली निकट जनप्रतिनिधिलाई महासचिव शंकर पाेखरेलले गरिदिए पदमुक्त

काठमाडौं । नेपाल कम्युनिष्ट पार्टी (एमाले)का अध्यक्ष केपी शर्मा ओलीलाई थाहै नदिई महासचिव शंकर पोखरेलले निर्वाचित नगरपालिकाका मेयर सहित वडा अध्यक्षलाई पदमुक्त गराएका छन् ।

रौतहटको देवाही गोनाही नगरपालिकाका मेयर प्रेमलाल साह कानु, सोही पालिकाका वडा नं. ४ का अध्यक्ष रामप्रवेश प्रसाद कुर्मी सहित केही निर्वाचित जनप्रतिनिधिलाई एमाले महासचिव शंकर पोखरेलले अध्यक्ष ओलीलाई थाहै नदिई कारवाही गरेपछि एमालेमा विवाद सुरु भएकाे छ । 

एमाले अध्यक्ष ओली निकट एक नेताका अनुसार कुनै पनि नेतालाई कारवाही अघि स्पष्टीकरण सोधिनुपर्ने, केन्द्रीय कमिटीको निर्णय आवश्यक हुनुपर्ने भएपनि सचिवालय बैठकबाट कारवाही गर्न नमिल्ने भन्दै आपत्ती जनाएका छन् । 

तर महासचिव पोखरेलले निर्वाचन आयोगलाई पार्टी सचिवालयको निर्णय भन्दै देवाही गोनाहीका मेयर साह सहितका जनप्रतिनिधिलाई कारवाही गर्न सिफारिस गरेका थिए । सोही निर्णयका आधारमा निर्वाचन आयोगले उनीहरुलाई पदमुक्त गर्ने निर्णय गरेपछि अध्यक्ष ओली असन्तुष्ट बनेका छन् । 

साहले एमाले पार्टीलाई तोकिएको लेबि नियमित बुझाउँदै आएका छन् । साथै पार्टीको बैठक, छलफल कार्यक्रममा समेत नियमित सहभागि हुदै आएको भए पनि जिल्ला कमिटी रौतहटको आन्तरिक द्धन्द्धका कारण महासचिव पोखरेलले अध्यक्ष ओलीलाई थाहै नदिई पदमुक्त गर्नका लागि निर्वाचन आयोगमा सिफारिस गरेको खुलेको छ । 

एमाले जिल्ला कमिटी रौतहटले ३१ जेठ २०८३ मा साह सहितका जनप्रतिनिधिलाई कारवाही गर्न केन्द्रीय कमिटीमा सिफारिस गरेको थियो । तर एमाले महासचिव पोखरेलले सो सिफारिस जेठ ८ गते नै गरेका थिए । निर्णय र सिफारिसको मितिका आधारमा महासचिव पोखरेलले हतारमा निर्वाचन आयोगमा पदमुक्तका लागि सिफारिस गरेका स्पष्ट देखिन्छ । 

संविधानमा स्थानीय तहका पदाधिकारीको पद रिक्त हुने अवस्था राजीनामा, मृत्यु वा पदावधि सकिएमात्र भनेर उल्लेख गरिएको छ । संविधानको धारा २१६ को उपधारा ८ मा स्थानीय तहका प्रमुख, उपप्रमुख, वडाध्यक्ष र सदस्यहरुको पद निजले राजीनामा दिएमा, मृत्यु भएमा र पदावधि सकिएमा रिक्त हुने प्रष्ट व्यवस्था छ । तर, एमालेले नगरपालिकामा अत्यधिक मतले निर्वाचित मेयरलाई बिनाकारण पार्टीको आन्तरिक द्धन्द्धका कारण पदमुक्त गराएको भन्दै आलोचना भइरहेको छ ।