रास्वपा र विवेकशील साझाबीच एकता घोषणा (तस्बिरहरू)

काठमाडौँ। राष्ट्रिय स्वतन्त्र पार्टी (रास्वपा) र विवेकशील साझा पार्टीबीच एकता घोषणा भएको छ।

आइतबार दिउँसो राष्ट्रिय सभागृहमा आयोजित एकता घोषणासभामा दुई दलका नेताहरूले एकतासम्बन्धी सहमतिपत्रमा हस्ताक्षर गरेका हुन्।

सहमतिपत्रमा रास्वपाका तर्फबाट कार्यबाहक सभापति डीपी अर्याल र विवेकशील साझाबाट अध्यक्ष समीक्षा बाँस्कोटाले हस्ताक्षर गरेका छन्।

असल शासन र समुन्नतिसँग सरोकार राख्ने दुई दलबीच एकीकरण भएकाे रास्वपाले जनाएको छ।

विवेकशीलले रास्वपाको नाम, नेतृत्व र चुनाव चिह्न स्वीकार गरी निःसर्त एकतामा जाने निर्णय गरेको थियो।

विसं २०६९ मा उज्ज्वल थापाको नेतृत्वमा विवेकशील अभियान सुरु भएको थियो। विसं २०७० मा विवेकशील नेपाली दल गठन भई चुनावी प्रतिस्पर्धामा गएको थियो। रास्वपा भने २०७९ असार ७ गते स्थापना भएको हो।