कांग्रेस सांसद बजगाईंले दिए आफ्नै पार्टीका मन्त्रीविरुद्ध उजुरी, यस्ता छन् आराेप

काठमाडौं। नेपाली कांग्रेसका सांसद राजेन्द्र बजगाईंले संस्कृति, पर्यटन तथा नागरिक उड्डयनमन्त्री बद्री पाण्डेलाई कारबाही गर्न माग गर्दै उजुरी दिएका छन् ।

सांसद बजगाईंले कांग्रेस सहमहामन्त्रीसमेत रहेका मन्त्री पाण्डेको अभिव्यक्तिलाई लिएर पार्टीकाे अनुशासन समितिमा कारबाहीको माग गर्दै उजुरी दिएका हुन्।

संविधान तथा पार्टीको सिद्धान्त उल्लंघन, पार्टीको विधान उल्लंघन तथा राष्ट्र र लोकतनन्त्रप्रति गैरजिम्मेवार अभिव्यक्ति दिएको आरोप लगाउँदै सांसद बजगाईंले कारबाहीका लागि फागुन २८ गते समितिमा पत्र पठाएका हुन् ।

‘म नेपाली कांग्रेसको निष्ठावान सदस्यको नाताले आफ्नो पार्टीभित्र वैधानिक प्रश्न उठाउने अधिकार राख्दछु। पार्टीको नीति, सिद्धान्त, संविधान र नेपाली लोकतान्त्रिक मूल्यहरू विपरीत हुने अभिव्यक्तिहरूप्रति ध्यानाकर्षण गराउँदै, नेपाली कांग्रेसका पदाधिकारी नेता एवं संस्कृति, पर्यटन तथा नागरिक उड्डयन मन्त्री बद्री पाण्डेद्वारा हालसालै सार्वजनिक रूपले व्यक्त गरिएको विचारप्रति गम्भीर आपत्ति जनाउँदै अनुशासनात्मक कारबाहीको माग गर्दछु’, उनले भनेका छन् । 

मन्त्री बद्री पाण्डेले हालै पशुपतिनाथ मन्दिर प्रांगणमा दिरुत्साहन अभिव्यक्ति र एक सार्वजनिक कार्यक्रममा एकदलीय चिनियाँ शासन प्रणालीका राष्ट्रपति सी जिनपिङको नैतिकतालाई नेपालको बहुदलीय लोकतान्त्रिक प्रणालीका नेताहरू र जनतासमक्ष लैजानुपर्ने धारणा व्यक्त भन्दै कारबाहीको माग गरेका छन् ।

‘मन्त्री बद्री पाण्डेले हालै पशुपतिनाथ मन्दिर प्रांगणमा दिरुत्साहन अभिव्यक्ति र एक सार्वजनिक कार्यक्रममा एकदलीय चिनियाँ शासन प्रणालीका राष्ट्रपति सी जिनपिङ को नैतिकतालाई नेपालको बहुदलीय लोकतान्त्रिक प्रणालीका नेताहरू र जनतासमक्ष लैजानुपर्ने धारणा व्यक्त गरेका छन्। नेपाली कांग्रेस, जसले प्रजातन्त्र, लोकतन्त्र र बहुदलीय गणतन्त्रको रक्षा गर्दै आएको छ, त्यसका एक जिम्मेवार मन्त्रीबाट यस्तो अभिव्यक्ति आउनु पार्टी सिद्धान्तविपरीत मात्र नभई नेपालको संविधान र राष्ट्रिय हितविपरीत समेत रहेको देखिन्छ’, उजुरीमा भनिएकाे छ ।