भीम रावलले नेकपा कालमा प्रचण्डले लगाएकाे आराेपकाे कपी पेस्ट गरे : प्रदिप ज्ञवाली

काठमाडौ, १९ पुस । नेकपा एमालेका उपमहासचिव प्रदीप ज्ञवालीले एमालेबाट निकालिएका नेता भीम रावलले प्रचण्डकाे आराेप कपीपेस्ट गरेकाे टिप्पणी गरेका छन् । रावलले पार्टी अध्यक्ष केपी शर्मा ओलीमाथि लगाएका आरोपहरू नेकपाकालमा प्रचण्डको १९ पेज लामो पत्रको कपीपेस्ट जस्तो भएको उनकाे भनाई थियाे ।

ललितपुरको च्यासलमा विहीबार बसेको सचिवालय बैठकपछि ज्ञवालीले सञ्‍चारकर्मीले सोधेको प्रश्‍नको जवाफमा यस्तो जवाफ दिएका हुन् । नेकपाकालमा प्रचण्डले तत्कालीन अध्यक्ष एवम् प्रधानमन्त्री केपी शर्मा ओलीमाथि यस्तै भाषामा अभियोग लगाएकाे भन्दै उनले भीम रावलको हिजोको गालीगलोज पनि एक किसिमको कपिपेस्ट जस्तै भएकाे बताए ।

बुधबार भीम रावलले  पत्रकार सम्मेलन गरेर केपी ओलीमाथि ७४ प्रश्‍न गरेका थिए । पार्टी केन्द्रीय कार्यालयमा बसेको सचिवालय बैठकका निर्णय सुनाउँदै पार्टीका उपमहासचिव ज्ञवालीले पुस २१ र २२ गते बस्ने केन्द्रीय कमिटीका निम्ति तयार गरिएको राजनीतिक प्रतिवेदन प्रस्तुत गर्ने निर्णय गरेको जानकारी पनि दिए । उनले राजनीतिक प्रतिवेदनका मुख्य मुख्य विषयहरुमा छलफल भएको पनि बताए ।