नेतृत्वले सहमतिका लागि दबाब दिँदा एमाले माेरङकाे चुनाव लम्बियाे

काठमाडाैं । केन्द्रले सर्वसम्मत नेतृत्वकाे प्रयाश गरेकै कारण  नेकपा एमाले मोरङको १०औँ अधिवेशनको मतदान सुरु हुन सकेकाे छैन ।

आइतबारबाटै निर्वाचन प्रक्रिया सुरू भए पनि याे समाचार तयार पार्दासम्म मतदान हुन सकेकाे छैन ।  मतदान सुरू नहुँदा प्रतिनिधिहरू अधिवेशनस्थलमा अलपत्र परेका छन् ।

अधिवेशनले ५ पदाधिकारीसहित १६५ जनाको जिल्ला कमिटी चयन गर्नेछ । १६५ पदका लागि ३२५ जनाको उम्मेदवारी परेको छ । नेतृत्वले सर्वसम्मत नेतृत्व छान्न दबाब दिए पनि आकांक्षीहरूले अडान नछाडेपछि चुनाव  हुने लगभग पक्का भएकाे छ ।

राजकुमार ओझा र अजम्बर राई छुट्टाछुट्टै प्यानल बनाएर मैदानमा होमिएका छन् । 

ओझा प्यानलको उपाध्यक्षमा शान्ति लिम्बू भुजेल, सचिवमा रविन थापा, उपसचिवमा शिल्पा निराला कार्की र इर्जालाल राजवंशीको उम्मेदवारी परेको छ ।

राई पक्षबाट अध्यक्षमा अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा सन्तोष बान्तवा र उषा झा मैदानमा छन् ।

मध्यान्ह १२ बजेपछि मतदान गर्ने भनिए पनि सहमतिको प्रयास बाँकी नै रहेको नेताहरूले बताएका छन् । प्रमुख निर्वाचन अधिकृत सुरेशलाल श्रेष्ठले सहमति प्रयास भइरहेको बताए ।